ياسمين عز عن جدل حلقة سهام جلال: هي في دار حق والموضوع انتهي
قالت الإعلامية ياسمين عز: «من يومين بالظبط توفت الفنانه سهام جلال وهي كان ظهورها المعروفة وأول ظهور ليها كان عندنا هنا في كلام الناس من خمس سنين ولما عملنا الحلقة من خمس سنين كان في غصة في قلبها وكانت بتعاتب بمنتهى الرقي وأنا أشهد لها إنها محترمة وطيبة وضيفة خفيفة».
وأضافت، خلال حلقة اليوم من برنامج «كلام الناس» المذاع عبر شاشة ام بي سي مصر: «ووقتها عاتبت النجم أحمد السقا وأمير كرارة على شيء ما وهو إنه مردش عليها.. عادي مامتك ممكن تبعتلك حاجة ومتشوفهاش غير بعد ساعتين ثلاثة».
وتابعت: «لما توفت رجعت الحلقة تاني والحمد لله البرنامج ده الأكثر مشاهدة عربيا ومش إحنا اللي بنقول كدا ده الأرقام اللي بتقول كده وإحنا مش عايزين نخوض صراعات والست في دار الحق.. اعتقد إنه احمد السقا من خمس سنين رد عليها وطيب خاطرها وكمان أمير كرارة قال إن الرقم اللي بعتتله بيه كان قديم وخلاص».
وأردفت: « عايزة أعرف ليه الردود الحلوة مبتعملش تريند زي الحلقة؟ هقولكم ليه علشان السوشيال ميديا بتحب المشاكل.. ويشهد البرنامج ده إن الناس بتطلع من عندنا متصالحة زي ظهور أحمد عزمي من خمس سنين ووقتها عاتب مدام إسعاد يونس على نفس الشيئ والست فورا كلمته وأنا بسعد لما الحلقة يطلع منها خير أكثر من التريند وكده كده إحنا ناجحين جدا ومش منتظرين تريند».
وواصلت: «ارفعوا ايديكم عن أمير كراره وأحمد السقا مفيش حاجة تتبرر أنا اللي موجودة في الحلقة وأنا اللي بقول والست عاتبت بمنتهى الرقيه اتفرجوا على الحلقة كاملة مش الفيديوهات عشان تفهموا هي مكانتش عايزه تضايق حد وكانت إنسانة جميلة وخلوقة وطيبة هي في دار الحق وهما ردوا عليها من خمس سنين.. لكن هو ده سلو بلدنا والنجمين الكبار إحنا كلنا وارد أي حد يبعت لحد من رقم غريب وميشوفش حاجة عادي.. كفاية الست في دار حق».
وفي سياق متصل، تداول رواد مواقع التواصل الاجتماعي مقطع فيديو من أحد اللقاءات التلفزيونية للفنانة الراحلة مع الإعلامية ياسمين عز في برنامجها كلام الناس، إذ كشفت الراحلة سهام جلال خلال هذا الفيديو عن موقف صادم جمعها بالفنان أمير كرارة والفنان أحمد السقا بعدما طلبت منهم إتاحة فرصة عمل لها.
مواقف صادمة تعرضت لها سهام جلال
حيث قالت سهام جلال: "كلمت أمير كرارة طلبت منه شغل وقالي عيني يا سوسو وبعدين مردش عليا تاني، وندمت أني كلمته لأني عزيزة النفس ومبعملش مكالمات كتير، ومافيش صحاب، كلمة صاحب مسئولية كبيرة، بس مافيش حد بيجبلي حاجة، كلمت أحمد السقا ومردش عليا، وميقللش مني أني أكلم زميل ولكن كانت الردود صادمة، بس أنا بعمل اللي عليا وبجري على شغلي".
