"ليه موقف حياتك على رد النجم".. مصطفى جاد يعلق على أزمة الملحنين
نشر المنتج مصطفى جاد منشورا عبر صفحته الشخصية على موقع التواصل الاجتماعي انستجرام يعلق فيه على بعض الأشخاص الذين ينتظرون فرص عمل من النجوم ، مشيرا إلى أن الموهبة الحقيقية تحتاج إلى السعي المتواصل للوصول إلى الهدف المطلوب تحقيقه .
مصطفى جاد
وكتب المنتج مصطفى جاد : مع كامل إحترامي و تقديري لسعي و إجتهاد زمايلي من مبدعين مصر الشعراء والملحنين والموزعين والمطربين والعازفين و مهندسين الصوت ، يقينك بالله وثقتك في عدله قصاد سعيك و تعبك على موهبتك هو السبيل الوحيد مش مين بيرد و مين مبيردش .. الطريقة نفسها بتاعت السعي لازم تتغير ويبقى فيه مشاريع إنتاج مشترك بين الصناع من نفس الجيل أو حتى من أجيال مختلفة .. انت ليه موقف حياتك على رد النجم من عدمه؟ ليه مقيم موهبتك على نزولك مع النجوم ؟ ، السنين اللي فاتت طلعت شباب زى الفل عملوا ورش مع بعض و صمموا على شكلهم ونجحوا جداً مع ناس من جيلهم وعشان كده النجوم بدأوا يجروا وراهم عشان يشتغلوا معاهم وعشان كده هما مختلفين و واقفين في حتة حلوة.
وأضاف : أنا لما بدأت إنتاج من ٢٠١٧ إشتغلت مع ناس كتيرة قوي بناءً على مشروعي و وجهة نظري مش بس اللي معروض عليا لأن أوقات كتيرة مش بتلاقيه غير لو قعدت وصنعته بإيدك مع زمايلك من الصناع و كنت شغال بالطريقة التقليدية و ما زلت شغال بيها و الحمد لله دوقت طعم النجاح واتعلمت حاجات كتير في النص ولسه بتعلم.. لكن في النص عملت تجارب إنتاج مشترك مع صناع كبار و مهمين زى عزيز الشافعي في ميني ألبوم (حبايب قلبي ) و عمرو مصطفى في أغنية ( روقاني ) ولسه هعمل كده مع ناس معينة أنا عايز أشتغل معاهم بغض النظر عن أساميهم ونجوميتهم.
وأوضح : غير كده أنا شغال بقالي ٦ شهور على مشروعي الغنائي و أول ألبوم ليا مع ناس بحبهم وبيحبوني شخصياً و موسيقياً و بنعمل الموضوع بشكل إنتاجي ذكي و تفاصيله متعبة بس ممتعة جداً لأن في الآخر المنتج هيكون ملكك بالكامل وطالما واثق في مشروعك و شغال عليه صح هييجي يوم و هيعود عليك بعائد كبير من نجاح و فلوس وشهرة.
واختتم : خلاصة كلامي ومعلش لو طولت..
السعي أحياناً بيكون إتجاهه و بوصلته غلط و محتاج إنك تعيد توجيه طاقتك و طريقتك تغيرها حسب المتغيرات اللي حاصلة لأن إحنا شغالين في مجال بيضم صناعة و تجارة في نفس الوقت ولازم مش بس تكون موهوب في المزيكا كصانع ماده انت لازم تكون كمان تاجر شاطر و شاطر قوي كمان وصدقوني هى طول عمرها كده.
