إيناس عز الدين عن قلة عدد المطربين : مصر مليانة مواهب عظيمة ولكنها مدفونة
حرصت الفنانة إيناس عز الدين على توضيح سبب ابتعاد المطربين في الفترة الماضية عن تقديم أعمال غنائية كثيرة ، موضحة أن السوق الغنائي مقتصر على عدد محدود من المطربين مما يزيد صعوبة ظهور وجوه جديدة بسبب عامل الإنتاج .
وكتبت إيناس عز الدين عبر صفحتها الشخصية على موقع التواصل الاجتماعي فيس بوك : الناس طول الوقت بتلومنا على عدم طرح أعمال جديدة و بنقرأ تعليقات كتير من نوعية انتوا مقصرين في حقنا كجمهور ، بطلتوا ليه تعملوا أغاني خاصة بيكم ، انتوا محتاجين ادارة شاطرة تعملكم اغاني .. الجمهور ما يعرفش ايه داير في المطبخ و ما يعرفش اننا في معاناة كبيرة و ان سوق الاغاني كله بيلعب فيه من خمس لعشر نجوم فقط و اغلبهم لو النهاردة بطلوا مش هتلاقي جيل جديد يستلم منهم الراية مش علشان مافيش موهوبين لكن علشان السوق بقو احتكار من كل النواحي من اول الكلمة واللحن و التوزيع لحد المطربين .
وأضافت : تورتة بتتقسم ١١ قطعة كل نجم في مجاله اخد قطعة كبيرة لوحده وقطعة واحدة اخيرة بتتقطع وتتفرق على كل الموهوبين اللي فاضلين .. بقى دلوقتي مطلوب من المطرب يبقى مطرب و منتج و يشق الأرض تطلع فلوس علشان يقدر ينتج عمل فني و برضوا بنسبة كبيرة حتى لو نجح مش هيعرف يثبت وجوده وسط باقي الحيتان اللي كل واحد فيهم بيزنق جنب التاني علشان ما يسيبوس مجال ولا مكان فاضي ولو بسيط لحد صغير يدخل وسطيهم .
واختتمت : هو انتوا فاكرين مصر بحالها مافيهاش موهوبين في كل مجال غير العدد اللي بتعد على صوابع الايد الواحدة اللي ظاهرين دول ؟ مصر مليانة مواهب عظيمة لكنها مدفونة
والجمهور قايم بدور المتفرج و الناقد فقط للأسف للموهوبين وبيحملهم ذنب مش ذنبهم .
وفي سياق أخر ، كشفت المطربة إيناس عز الدين، عن تعرضها للمضايقة من قبل دكتور بجامعة الأزهر، عبر حسابها الرسمي على موقع التواصل الاجتماعي "فيسبوك".
وكتبت إيناس عز الدين، قائلة: "لما دكتور جامعي يبقى سليط اللسان وبيطاردني في التعليقات مرة بالإساءة و مرة بالمجاملة وقولتله هتوجه ضدك بشكوى رسمية لجامعة الأزهر وهتقدم ببلاغ رسمي ضدك و برضوا يستمر في التطاول والإساءة بدون لا سبب ولا معرفة".
وتابعت إيناس عز الدين، قائلة: "شوية يروح راجع تاني يكتب فيا كلام شعر وبما إن صفحته مُعلنة وهو شخص معروف وصوره على حسابه وموثق فأبلغته إني هتخذ ضده الإجراءات القانونية وبرضوا لم يتوقف".
وأكدت إيناس عز الدين، عن استمراره في مطاردتها قائلة: "بالعكس ده أخرهم تصل به البجاحة إنه يتهم صرح عظيم زي دار الاوبرا المصرية ووزارة الثقافة إنهم بيضحكوا على الناس و ينصبوا عليهم ويسوقوا لحفلات وهمية باسم فنانة معينة وذكر اسم فنانة بالتحديد و يوم الحفل يطلعوا فنانة أخرى (وهي أنا)".
وأضافت إيناس عز الدين، قائلة: "طبعًا هذا الكلام عاري تمامًا من الصحة وكل حفلات دار الاوبرا بيتي العظيم بينزل قبل موعد الحفل بوستر الحفل على الصفحة الرسمية وجدول الحفلات المعلن بكل المطربين اللي هيشاركوا في الحفل يعني هذا اتهام صريح وإساءة بالغة لصرح يكاد يكون الوحيد اللي بيقدم فن راقي و بيحافظ على التراث في مصر في الوقت الحالي كمحاولة لضرب هذا الصرح".
