تراجع أسعار الطماطم من 60 إلى 40 جنيها.. «الزراعة» تكشف التفاصيل
قال الدكتور ألفونس جريس وكيل معهد بحوث البساتين بوزارة الزراعة، إنه يريد توجيه رسالة طمأنة لكل الشعب المصري كأحد أفراد وزارة الزراعة واستصلاح الأراضي بأن أزمة ارتفاع أسعار الطماطم مؤقتة، معلقا: «زي ما الناس كلها عارفة الطماطم مجنونة،وفي تذبذب شديد جدا،يعني إحنا في مثل هذا الوقت من السنة الماضية كانت الطماطم بـ2 جنيه و3 جنيه وكانت منتشرة بكمية كبيرة، لكن ما حدث هذا الموسم في 2026 هو تذبذب في درجات الحرارة وارتفاعها في وقت الشتاء».
خطوات استباقية لوزارة الزراعة
وأضاف خلال مداخلة هاتفية ببرنامج «هذا الصباح»، المذاع على قناة «إكسترا نيوز»: «كل حاجة بتتأثر وبالتالي النبات، باعتباره كائن حي، بيتأثر وده بيأثر على محصول الطماطم، إنما الحمد لله وزارة الزراعة عملت خطوات استباقية كثيرة جدا منها التوسع في الزراعات المحمية وإنذار مبكر للتغيرات المناخية بأحدث الأجهزة وقامت بتدريب الباحثين على الاستشعار عن بعد بحيث نقدر نتنبأ بالتغيرات المناخية ونتعامل معها، بالإضافة إلى المكافحة الحيوية لبعض الحشرات،لأن الطماطم أيضا تصاب بحشرات كتيرة».
تراجع أسعار الطماطم
وتابع: «كل الخطوات الاستباقية دي عملتها وزارة الزراعة علاوة على الإرشاد الزراعي والمتابعة مع الفلاحين في الأراضي كلها، وأنا حابب أبشركم إن الطماطم كانت امبارح بـ60 جنيه والنهارده هتنزل لـ40 جنيه، وفعلا بعض الناس شافت ده».
وواصل: «اللي بيحصل إن عندنا متابعة مستمرة في أسواق العبور و6 أكتوبر والإسكندرية، وكانت الطماطم فعلا بـ60 جنيه لكن في سوق العبور العداية نزلت من 1100 جنيه إلى 700 جنيه وما زالت الأسعار بتنخفض كلما زاد المعروض».
التنسيق مع وزارة التموين والجهات المعنية
وأوضح: «الوزارة تتابع كل ده بالتنسيق مع وزارة التموين والجهات المعنية وده بيضمن وجود رقابة دقيقة تمنع أي مغالاة أو تحكم في الأسعار، كما أن المزارع المصري بيوصله الإرشاد الزراعي والتوصيات الحديثة باستمرار، إحنا لسه مطلعين نشرة جديدة عن الطماطم بالتعاون بين معاهد الوقاية والبساتين والأمراض. بصراحة الدكتور عادل عبد العظيم في مركز البحوث الزراعية مخلينا زي خلية نحل في كل المحافظات عشان نقدر نوصل للمزارعين ونوجههم».
تصل إلى 40 جنيه
واختتم: «العروة اللي فاتت كنت في بني سويف والفيوم والغربية والشرقية والمنوفية، وكل ده بيخلي مفيش فجوة بين البحث العلمي والأرض، وده كله بيأكد إن الخير جاي بإذن الله، لذا الفترة دي مؤقتة، وخليني أقول لكم من امبارح للنهارده الأسعار نزلت 40 و25 جنيه، وبإذن الله على العيد هتبقى الأسعار متوسطة وعلى أول يونيو كل الزراعات الصيفية ودي أكبر عروة للطماطم هتكون دخلت السوق، أنا مش بتكلم في شهر، أنا بتكلم في 10 أيام فقط، والطماطم هتبقى متوفرة وبجودة عالية جدا».
