«مركز المناخ» يزف بشرى: انخفاض أسعار الطماطم خلال أيام معدودة

تحدث الدكتور محمد فهيم رئيس مركز معلومات تغير المناخ، عن السبب الحقيقي وراء ارتفاع أسعار الطماطم خلال الفترة الحالية، قائلا: «هبدأ بموضوع التصدير إحنا بننتج في مصر تقريبا طول السنة ما بين سبعة لـ8  مليون طن طماطم في عروات متداخلة جدا تكاد تكون عروات كل كام يوم بيتزرع عروة جديدة، غير كل المحاصيل الثانية».

نسبة الإنتاج المحلي من الطماطم

وأضاف، خلال مداخلة هاتفية ببرنامج «آخر النهار»، المذاع على قناة «النهار»: «صادراتنا من الطماطم في 2025 كانت تقريبا 65 ألف طن،  يعني تمثل نسبة ضئيلة جدا من إنتاجنا المحلي، والسنة دي لم نصل إلى هذه القيمة حتى الآن، إذا موضوع الصادرات يمكن مالوش علاقة بالأسعار».

خطورة التغيرات المناخية

وتابع: «التغيرات المناخية خلال العروة دي، العروة اللي بتباع في السوق دلوقتي، عروة اسمها صيفي مبكر بتتزرع في فبراير وبداية مارس ودي الفترة اللي بتتجمع فيها دلوقتي، دي تعرضت بقسوة لمناخ غريب، يمكن لم تعهد مصر هذا المناخ من زمان جدا، اللي هو مناخ نهاية الشتاء والربيع».

وواصل: «عبارة عن شتاء متأخر جدا، والناس كانوا حاسين بالبرودة لغاية أسبوعين أو ثلاثة أسابيع فاتوا، وكانت درجة الحرارة ما دون الـ10 ليلا، وده شتاء متأخر، بالإضافة إلى صيف مبكر، وكأن مفيش ربيع، صيف مبكر اللي هي موجات الحرارة الشديدة جدا اللي حصلت من أكثر من 4 أو 5 أسابيع، في فترة مهمة جدا في عمر المحصول، اللي هي فترة التزهير والعقد وبداية الجمع، والكلام ده، ما أدى في النهاية إلى إن كثير من المناطق تعرضت إلى نقص إنتاجية واضح».

تغير المناخ في مصر

وأوضح: «تغير المناخ في مصر رغم ما يحدث هو أقل ما يمكن على مستوى العالم، إحنا ما عندناش أشكال عنيفة لا فيضانات ولا سيول ولا غيره، يمكن الحاجة البسيطة هو اللي بيحصل دلوقتي، ورغم ذلك الناس بتتأذى وتتضايق».

رسائل وتوصيات وإنذار مبكر

وأكد: «فإحنا من بداية الموسم بالمناسبة كان في رسائل وتوصيات وإنذار مبكر، يعني تقريبا من شهرين مركز المعلومات بينزل توصيات ويقول خلي بالكم هيحصل ما يسمى بالتنفيل، يعني الزهرة تيجي تعمل ثمرة صغيرة خالص وتروح ميتة لأن تذبذبات الحرارة بتخلي الكالسيوم اللي النبات بيحتاجه يقف، ولولا هذه التوصيات وأمور ثانية مكناش هنشوف أي إنتاجية في العروة، وكانت ساعتها الكيلو يبقى بـ150 جنيه».

انخفاض الأسعار خلال أيام معدودة

واختتم: «نقدر نقول إن في خلال أقل من أسبوعين هتبدأ عروة جديدة اسمها عروة الصيف العادية هتبدأ تخش في الإنتاج، فكثير من هذه الأسعار ستنتهي بالتدريج، يعني مش بعد أسبوعين لسه الأسعار هتنخفض، لا، في أيام معدودة هنبص نلاقي الأسعار نزلت».