«مجنونة يا أوطة».. تامر أمين يفجر مفاجأة عن السبب الحقيقي لجنون أسعار الطماطم

علق الإعلامي تامر أمين على أسعار الطماطم خلال الفترة الحالية، قائلا: «دلوقتي كيلو الطماطم أعتقد بيتراوح ما بين 50 و70 جنيه ومش متوفرة بكثرة، وفي نقص في المعروض في الأسواق، المشكلة إن إحنا بين روايتين ومش عارفين إيه الحقيقة أو الخطأ فين أو طب علاجها فين، طب هتستمر إزاي؟ مش عارفين».

السبب الحقيقي وراء ارتفاع أسعار الطماطم

وأضاف، خلال تقديم برنامجه «آخر النهار»، المذاع على قناة «النهار»: «في رواية بتقول إنه بسبب التقلب بتاع المناخ وتقلب الطقس اللي مش معتادة عليه مصر في هذا الوقت من شهور السنة، وإن إحنا مرينا بفترة الشهرين اللي فاتوا كان الجو فيها الصبح حر وبالليل برد، ويومين موجة حارة ويومين موجة باردة، وحاجات من دي أدت إلى إن العروة بتاعة الطماطم مظبطتش، وبالتالي في جزء من المحصول باظ، وجزء حصل له مش عارف إيه وكذا».

القصة مالهاش علاقة بالعروة ولا بالطقس

وتابع: «في رواية ثانية بيقولوا لا، القصة مالهاش علاقة بالعروة ولا بالطقس، القصة ليها علاقة إن نسب التصدير من الطماطم زادت فبالتالي المعروض في السوق المحلي قل، وده اللي عامل الندرة، وبالتالي ده اللي عامل غلاء الأسعار، وناس ثانية قالتلك أصل التقاوي اللي اتحطت في مش عارف إيه».

وواصل: «كله بقى بيقول روايته، وكله بيقول تفسيره واجتهاده، دون أن نعلم حقيقة إيه السبب الرئيسي في مشكلة الطماطم وغلاء سعرها في الأسواق المصرية هذه الأيام».

توصيات وإنذار مبكر

من جانبه، قال دكتور محمد فهيم، رئيس مركز معلومات تغير المناخ، خلال مداخلة هاتفية مع الإعلامي تامر أمين: «من بداية الموسم بالمناسبة كان في رسائل وتوصيات إنذار مبكر، أنا تقريبا من شهرين مركز المعلومات بينزل توصيات ويقول: خلي بالكم، هيحصل ما يسمى بـ«التفليغ». يعني إيه التفليغ؟ يعني الزهرة تيجي تعمل ثمرة صغيرة خالص وتروح ميتة، لأن تذبذبات الحرارة بتخلي الكالسيوم اللي النبات بيحتاجه يقف، تخلي كذا وتخلي كذا».