إبراهيم عيسى عن مشاركته في إعلان العاصمة الجديدة: لا يجب أن نبقى أسرى آرائنا

تحدث الإعلامي إبراهيم عيسى عن سبب مشاركته في إعلان العاصمة الجديدة، قائلا: «طب بذمة أبوك انت مغيرتش رأيك دلوقتي في حسني مبارك، يعني بعد اللي احنا شوفناه من بعد 25 يناير لغاية دلوقتي مش بتقول دلوقتي أسفين يا ريس أو يا ريت فين أيامه والله ده كان راجل كويس ده كان رئيس مش  عارف اي ما انت مغير رأيك أهو».

تغيير الرأي مهم

وأضاف، خلال فيديو عبر اليوتيوب: «تغيير الرأي يا جماعة وحتى اللي بيقابلني يقولي أنا غيرت رأيك أنا كنت أو بيكتب وبيقول مثلا أنا كنت بحترمه وكنت بحبه بس هو غير رأيه أنا مبقتش، طب ما أنت غيرت رأيك اهو أنت غيرت رأيك فيا فبتصادر عليا إن أنا بغير رأيي، إذا كنت انت غيرت رأيك يا عزيز فانت يعني خليك يعني في حالة كده يعني توازن في الحكم». 

الإمام الشافعي غير رأيه

وتابع: «تغيير الرأي ده حاجة مهمة للغاية يعني زي ما دايما بحكي عن الإمام الشافعي مثلا وطول وقت بتتقال أمثلة هي مش حقيقة على فكرة ومش دقيقة بس هكلمكم عن المثل يعني اللي هو فكرة إنه كان عنده فقه قائم بذاته مدرسة في الفقه في العراق جه لما جه مصر غير أفكاره وغير الفقه بتاعه رغم عدم دقة هذا الكلام أوي، لكن بيتقال مثلا كثيرا جدا على أنه الإمام الشافي غير أراءه وغير فتاويه ولما جه مصر تغير، طب ما هو بيغير أهو فين التغيير فين التغيير يبقى غلط إطلاقا يا جماعة».

التجارب العلمية والعلم نفسه بيتغير

وواصل: «التجارب العلمية والعلم نفسه بيتغير بمعنى أنه في نظرية علمية وبعدين يثبت أن هذه النظريه العلمية خاطئة فبتتغير النظرية العلمية ينزل دواء فبيتاثر فكتشف أن الدواء فيه آثار جانبية أكتر فبيحصل تغيير للدواء».

وأوضح: «الدكتور نفسه بتروح تتعالج عنده تروح تكشف عنده فبيكتب لك روشتة وبعدين بعد أسبوع أو 10 أيام بيشوف فبيغيرلك الدواء ها ها بيحصل ولا لا بيغيرلك الدواء  في تغيير حتى للدواء للعلاج فالتغيير دي مسألة طبيعية بل واجبة». 

تغيير الرأي فكرة مهمة للغاية 

وأكد: «تغيير الرأي فكرة مهمة للغاية وضرورة لأنك متبقاش أسير رأيك، اليسار كله أسير صندوق من الأفكار القديمة الجامدة اللي مش عايز يراجعها ولا يناقشها، بالتالي تغيير الرأي وتغيير الموقف غير تغيير المبدأ وتغيير القيم دي قصه تانية خالص».

تغيير رأيه في جمال عبد الناصر

واختتم: «يعني انت واحد طول الوقت زي حالاتي مؤمن بالحرية مجيتش قولت أنا موافق على الاستبداد وبحبه، مش تقول غيرت رأيي ا إنما مثلا كان زمان أنا بعتبر أنه جمال عبد الناصر ومصطفى النحاس أعظم شخصيتين اللي حصلوا في مصر لا غيرت رأيي هو مصطفى النحاس بس وغيرت رأيي في جمال عبد الناصر ناصر وغيرت موقفي منه ومن الناصرية كلها بعد ما كنت عضو في الحزب الناصري بعد ما كنت أمين نادي فكر الناصري في جامعة القاهرة».