لبلبة: عادل إمام أعظم فنان.. وأجمل أفلام عملتها كانت معاه
قالت الفنانة لبلبة، خلال مداخلة هاتفية ببرنامج «مساء جديد» مع الإعلامي يوسف الحسيني، إن الفنان عادل إمام هو «أعظم فنان»، مؤكدة أنها تعلمت منه الكثير.
ووجهت «لبلبة»، كلمات للفنان عادل إمام، خلال مداخلة هاتفية ببرنامج «مساء جديد» مع الإعلامي يوسف الحسيني «أقول له يا أعظم فنان كل سنة وأنت طيب، ويا أطيب قلب، يا أعظم فنان مخلص لفنه وبيعشق جمهوره وأدى حياته كلها للفن، ومافيش حد قدم أدوار متنوعة زي دي، وأجمل كواليس كانت بيني وبين الأستاذ عادل، عشرة طويلة طبعا، وأجمل أيام حياتي قضيتها وأنا بشتغل معاه».
أجمل أفلامي كانت مع الأستاذ عادل إمام
: «ربنا يخليك ليا، وأنا استفدت كتير من جماهيريتك، وأجمل أفلامي عملتها معاك، والجمهور حبنا مع بعض، ولما بروح أي بلد أو أقابل أي حد يسألني: إزاي الزعيم؟ إزاي الأستاذ عادل؟ أخباره إيه؟ هتشتغلوا إمتى مع بعض؟».
وتابعت: «هو أخلاقه جميلة وعنده نبل في الأخلاق ومن أذكى ما يمكن، اتعلمت منه كتير، اتعلمت منه إزاي أنوع في أدواري، وكان دايما لو في حاجة ينصحني يقول لي: ما ترفضيش كتير، اقعدي مع المخرج وصلحوا الدور، وما تبعديش عن الجمهور».
نصيحة الفنان عادل إمام لـ «لبلبة»
وأكملت: «كان دايما يقول لي: إنت لو بعدتي عن الجمهور مش هتقدري، لأنك فتحتي عينيكي على الشغل وإنت عندك خمس سنين، ولو بعدتي عن الجمهور ممكن تعيي أو يحصل لك حاجة».
موقف إنسانية جمعت عادل إمام ولبلبة
وكشفت عن مواقف إنسانية جمعتهما، قائلة: «مش ممكن أنسى إزاي وقف جنبي وقت قبل رحيل أمي الله يرحمها وبعد ما رحلت، وحسسني إنه هو عيلتي وعيلته وأولاده هم ولادي، والزوجة الجميلة أختي هالة، دول عيلتي فعلا».
وأضافت: «ربنا يبعد عنه كل حاجة وحشة، وهو حياته كلها إنه يضحك الناس، وأنا بقول يا رب تفضل طول حياتك تضحك وربنا يخليك ليا، وعمرك ما تشوف يوم وحش».
العمل معه كان يحمل أجواء أسرية
وأكدت لبلبة أن العمل مع عادل إمام كان يحمل دائما أجواء أسرية مختلفة، موضحة: «مع الأستاذ عادل بحس إنه قريب لي، ما بفكرش في أي حاجة، هو بيعمل حالة أسرية جميلة في الشغل، وبناكل مع بعض ونهزر مع بعض ونفكر مع بعض، وآخر يوم في العمل بنبقى زعلانين إن التصوير خلص».
وتابعت: «الفنان يشتغل معاه يبقى مستريح، وواخد باله من كل حاجة، وبيساعد كل الفنانين اللي بيشتغلوا معاه، وهو معجزة، وربنا جابه للحياة الفنية، ومافيش طعم للحياة الفنية من غيره، وأنا بفتكره في كل لحظة، ولما يجيلي سيناريو أقول يا ترى لو عادل شاف السيناريو ده هيقول لي اشتغليه ولا هيقول لي بلاش؟».
