بعد واقعة قطع الكهرباء عن سفير بلجيكا.. ياسمين عز: كان هيعملنا أزمة دبلوماسية

علقت الإعلامية ياسمين عز، على واقعة قطع الكهرباء عن منزل سفير بلجيكا في مصر، بمنطقة العمرانية، بغرض السرقة، قائلة: «فيه حرامي اتسبب في قطع النور 3 ساعات عن بيت السفير البلجيكي في العمرانية، كان هيعملنا أزمة دبلوماسية بسبب سرقة أسلاك الكهرباء». 

وأضافت ياسمين عز، خلال برنامج «كلام الناس» المذاع على قناة إم بي سي مصر، «اللي لفت نظري هو ليه سفير بلجيكا قاعد عندنا في العمرانية ليه مش في حتة تانية». 

وتساءلت ياسمين عز، قائلة: «هل السفير عنده قرايب في العمرانية أو عايز ياكل مكرونة انسجام، بالنسبة للحرامي أنت صغرتنا قدام الأجانب ومش سارق حاجة كبيرة، وبعدين كان ممكن تتكهرب يعني سرقة وفضيحة». 

ليه نعاقب المواطن على مخالفة معملهاش

وفي سياق آخر، علقت الإعلامية ياسمين عز على أزمة العدادات الكودية التي تصدرت حديث الناس عبر وسائل التواصل الاجتماعي في الأونة الأخيرة، قائلة: « ناس كتير بتشتكي أنه فاتورة الكهربا بتزيد عليهم وهتزيد أكتر عشان الصيف والحر اللي داخل علينا والحكومة قررت أنه كل العدادات الكودية تتحاسب بسعر أعلى شريحة». 

وأضافت ياسمين عز، خلال برنامج «كلام الناس» المذاع على قناة إم بي سي مصر، « واللي بيتحاسب في كل الموضوع ده هم السكان والمواطنين العاديين وليسوا أصحاب العقارات نفسهم، ف ليه نعاقب المواطن على مخالفة معملهاش ويجي يتصالح يلاقي الإجراءات صعبة»، متابعة: «وصاحب العمارة اللي عمل المخالفة كسب ومشي». 

بلاش نضغط على الناس

واستكملت ياسمين عز: « بلاش نضغط على الناس أكتر من كده لأنه الحالة صعبة وفي ناس كبيرة تكلمها وتلاقيها مش فاهمه وتسألك هو يعني اي العداد الكودي، فإحنا بكده نكون صعبنا على الناس حاجه ممكن نسهلها». 

وطالبت: « يا جماعه أرجوكم وأرجو المسؤول عن هذا الموضوع من فضلك سهل على الناس هي الناس مش بتقولك أنا مش عايز أدفع لا الناس عايزة تتصالح فأنا مالي كمواطن أشيل مخالفة مقاول ليه هو أنا هكسب قد المقاول يعني يبقى باني عمارتين و 3 و 4 وقاعد مدفي جيبه وقاعد مش ساكن في البيت عندي».