ياسمين عز: احنا داخلين على موجة حارة.. والست التوب تعمل لجوزها كنتالوب

قدمت الإعلامية ياسمين عز نصيحة لكل ست متجوزة، قائلة: مع دخول الصيف والموجة الحارة الجامدة اللي جايه علينا، والحرارة اللي ممكن توصل لـ40 و45.. ده التوقيت الرسمي دلوقتي إن جوزِك يقعد بالفانلة الحمالات قمر 14، وإنت بقى تدخلي على مرحلة الزوجة الريفريش رسمي.

وصفة عصير الكنتالوب

وأضافت ياسمين خلال حلقة اليوم من برنامجها «كلام الناس»، على «إم بي سي مصر»: ممكن تعملي لجوزِك حلة كوكتيل موز على فراولة، تقطعيهم حتت كده وتحطيهم في مية ساقعة بعسل وشربات، لو ملقتيش عسل وشربات سقي بجوزك وفنلاته.

وتابعت ياسمين: «حطي شوية من نبات النعناع طازة، ولو عايزا تعملي أي عصير ناجح حطي نعناع منه ينعش جوزك، ويطهر بطنه من التلبك المعوي اللي بيجيله بسبب أكلك المعجن.

الست التوب تقطع كانتالوب

وواصلت ياسمين: «لازم تقطعي الكانتالوب قطع لأن «الست التوب تقطع كانتالوب»، وده مثل شعبي مصري عظيم قامت عليه بيوت ناجحة.

وأشارت ياسمبن عز: وأنتِ بتقطعي الكانتالوب، حطي على كل قطعة خلة سنان، وعلى الخلة شمسية صغيرة.. اعملي لجوزك جو فنادق في البيت، حسسيه إنه في قرية سياحية مش في شقة إيجار قديم.

وفي حلقة سابقة، علقت الإعلامية ياسمين عز على قانون الأسرة الجديد والذي يتمثل في أنه من حق الزوجة فسخ عقد الزواج خلال أول 6 أشهر في حالة ثبوت الزوج أن يدعي على نفسه صفات غير حقيقية، قائلة:«يعني بدل مانحل مشاكل الأسرة نعمل مشاكل جديدة للراجل». 

وأضافت، خلال برنامج «كلام الناس» المذاع على قناة إم بي سي مصر، «الراجل مقهور وهيهج من البلد ويمشي وفي بندين في القانون مضايقيني جدا والبند الأول الخاص بإدعاء الزوج بصفات غير حقيقية يعني لو عمل كده تقوم الزوجه مدياله واحده إنت طالق». 

ياسمين عز تهاجم المرأة 

وتابعت: « طب ما هي الست قبل الجواز شغاله كذب وتدليس وبتدعي إنه فيها ماليس فيها وتقوله أنا طباخة بريمو وأما يتجوزها يصحى تاني يوم الرز معجن وشايط وتقوله ده أنا هعيشك عيشة حب وهنا وتاني يوم النكد والبوذ قد الزلومة».