عمرو أديب يهاجم نظام الطيبات: عامل زي اللي ماسك مدفع رشاش وبيموت الناس

شن الإعلامي عمرو أديب هجوما حادا على الجدل الدائر حول ما يعرف بـ«نظام الطيبات» المرتبط باسم ضياء العوضي، مؤكدا أن الأزمة الحقيقية ليست في الشخص، بل في «انهيار الوعي والإدراك والمنطق» داخل المجتمع.

اللي بيحصل ده انهيار وعي

وقال أديب خلال حلقة اليوم من برنامج الحكاية: «يا جماعة اللي بيحصل ده انهيار وعي.. أي دواء في الدنيا ليه أبحاث ونتائج وناس متخصصة، إنتو مش عايزين الناس تخف ولا إيه؟».

مدفع رشاش بيموت الناس

وأضاف: «اللي بيجنني بقى إن في مثقفين يقولك كل واحد حر.. يعني إيه حر!.. أنا أشوف واحد ماشي في الشارع بمدفع رشاش وبيضرب في الناس وأسكت وأقول هو حر!».

وتابع: «اللي ماسك مدفع ممكن يقتل 10، إنما اللي عمله ضياء العوضي جريمة أكبر.. إحنا في مجتمع أصلا الناس فيه مش لاقية دوا ولا خدمة صحية، تيجي تقولهم سيبوا علاج السكر والضغط والكيماوي!».

مفاجآت حول تفاصيل "نظام الطيبات"

وكان قد فجر الدكتور هشام الخياط، أستاذ الجهاز الهضمي والكبد، مفاجآت حول تفاصيل "نظام الطيبات" وما يسببه من كوارث صحية، مؤكدا أن مروج هذا النظام اخترع أشياء لم يسبق لها مثيل في تاريخ البشرية، محذرا من أن اتباع هذه النصائح أدى لإصابة مرضى بفشل كبدي ووفاة آخرين.

خرافة السكر ومنع المياه

وانتقد هشام الخياط، خلال مداخلة هاتفية مع الاعلامي احمد موسى ببرنامج على مسؤوليتي المذاع عبر قناة صدى البلد، نصائح العوضي بالإكثار من السكريات ومنع المياه، قائلا: "الراجل ده اخترع حاجة مفيش حد في البشر اخترعها.. قال لنا الإكثار من الحلويات والسكر، ومعروف جيدا أن زيادة السكر تؤدي للإصابة بالسكر والسمنة ومتلازمة الأيض"، وتابع منع شرب المياه: "قال لك ما تشربوش ميه.. الميه مهمة جدا وخاصة لمرضى الشريان التاجي، ولازم يشربوا على الأقل 2 لتر يوميا، وعدم شرب الميه كان من أسباب وفاته شخصيا بجانب التدخين والعصبية".