استشاري صحة نفسية عن لاعبي الأهلي: مش حاسين إن الناس بتقطع من لحمها عشان تذكرة

سألت الإعلامية ياسمين عز، الدكتور وليد هندي استشاري الصحة النفسية، قائلة: «عايزة أعرف نفسيا لاعيبة الأهلي مالها وزيزو ماله وإمام عاشور ماله؟؟».

ليجيبها استشاري الصحة النفسية، خلال استضافته في برنامج «كلام الناس» المذاع عبر شاشة ام بي سي مصر: «حينما يتحول لاعب كرة القدم لرجل أعمال متنتظريش منه أي مجهود لأنه مش بيهين نفسه مش هيمرمط نفسه علشان يتعرف.. في أجيال كانت بتنزل تاكل النجيلة عشان تعمل لنفسها اسم أو سمعة أو فلوس، طالما هو أخد الصورة من بابها متستنيش منه أي مجهود دي ناس شبعت واستغنت»

وتابع: «هتلاقي لاعب بيلعب في شعره عشان بيحاول يثبت ذاته ودي متلازمة علشان يثبت إنه مش خسران اللاعب طول ما هو عايش في حاله انفصام عن الجمهور والواقع وفي غيبوبه مش هيعمل حاجه، مش حاسس بالناس بيتحرق دمها وبتقطع من لحمها عشان تجيب تذكرة أو تدفع باقه نت عشان تشوف ماتش ومش شايف ده هو خايف على نفسه وعلى منظره».

وفي وقت سابق، قالت الإعلامية ياسمين عز: «حلمت خير اللهم اجعله خير الأهلي كان لابس أحمر في أحمر وراكب حصان أحمر في أحمر ماشي وسط زرع أخضر في أخضر ولقى قدامه شجره أبيض في أبيض أغصانها بيضاء تجنن نازل منها غصنين على كل غصن نازل منه بطيخة، راح خطفهم وجاري، إن صدقت رؤياي يبقى الأهلي هيكسب 2-0».

وأضافت: خلال حلقة اليوم من برنامج «كلام الناس» المذاع عبر شاشة ام بي سي مصر: «لاعيبة الأهلي يا جماعة إيه الحلاوة دي والشطارة دي والأداء العالمي اللي مشفتش قبله ولا بعده ولا هنشوف ده ولا في  cr7  وأصحابه.. وإمام عاشور كان مموت نفسه وقلبه على الفرقه ياي من كتر الحماس كان هيطقله عرق بعد الشر عليه وعلى اللي حواليه ولا كان بيتدلع ولا أي حاجه أنا اللي بتدلع،  ولا زيزو مين يقدر يتكلم على زيزو ده ظابط نفسه على الشعره يعرف أمتى يشوط الكوره وأمتى يسرح الشعره، في الدقيقة 30 يشوط الكورة والدقيقة 31 يسرح الشعره 32 يعدل التيشرت ده الواجهه بتاعتنا، ومصطفى شوبير واقع وكله ملموم ووسط كل الأجواء دي زيزو بيعدل شعره يمين وشمال عشان يخفف من حدة الموقف مش كل حاجه تاخدها بالسلبي لازم نخطف الكاميرا عشان منتفضحش قدام الناس»