ياسمين عز: البطيخة بقت بـ300 جنيه؟.. أنا فاكرة كانت بـ 5 بس
قالت الإعلامية ياسمين عز: «فجأه كده البطيخة بقت بـ300 جنيه؟؟ أنا فاكرة زمان كانت ب5 جنيه مش فاكرة سنة كام بالظبط ولوغليت جامد بتوصل 7 جنيه ونص وأعلى مكان كان 15 وده قبل ما أتولد وإحنا مش عارفين بسبب إيه».
وأضافت، خلال حلقة اليوم من برنامج «كلام الناس» المذاع عبر شاشة ام بي سي مصر: «وطلع نائب رئيس شعبة الخضراوات والفاكهة قال إللي مش عاجبه بياكل كنتالوب أو موز الله عليك يا أستاذنا مش عارفة من غيرك كنا هنعمل إيه طب الناس اللي بتحب البطيخ نعمل إيه».
الموز أرخص
وفي سياق متصل، قال الدكتور حاتم النجيب نائب رئيس شعبه الخضروات والفاكهة بالغرفة التجارية: «تصريح إللي مش عاجبه سعر البطيخ يجيب موز أو كنتالوب ده مش حقيقي ومخرجش عن لساني ولا يمط لينا بصلة أنا قلت إن في تحركات لبعض المنتجات علشان تتراجع سعرها في خلال أسابيع والحمد لله بقى لنا أربع أيام في تراجع مستمر نتيجه زياده المعروض للأسواق».
وأضاف، خلال مداخلة هاتفية له في برنامج «كلام الناس» المذاع عبر شاشة ام بي سي مصر، مع الإعلامية ياسمين عز: «إحنا متابعين مع رئيس الوزراء فعلا في حاجات انخفضت زي الطماطم وبناكد لكل أهالينا إللي عايز ياكل أي منتج براحته، لكن إحنا عندنا توقيت للزراعة وفي بعض عوامل جوية ممكن تاثر على المحاصيل وقلت كمان إن تكلفه الإنتاج زادت بسبب الأحداث العالميه لكن مقلتش إللي مش عاجبه البطيخ ياكل الموز والكلام ده خطأ».
وتابع: «إحنا بنطلع للناس نصارحها ونطمنها ونقولها الحقيقه ونقول إن إحنا عندنا مواسم وده طبيعي وعلى أرض الواقع لكن مقلناش إللي مش عاجبه ياكل أو مياكلش ده كلام مخرجش على لساني».
وأردف: «إحنا عايزين نبشر الناس الخوخ انخفض والبطيخ انخفض والكنتالوب في متناول كل مواطن مصري، والبطيخ ب٧٥ ل ١٢٠ جنيه وفي أسواق التجزئه من 100 ل 150 وهتنخفض أكتر لما يكتر المعروض، وكمان ورق العنب والبامية والملوخية والبطاطس والبصل كلها فيها انخفاض وده هيظهر في الأسواق خلال الفتره الجاية».
