هيثم دبور : فيلم ضي اتبنى على الكينج محمد منير

أكد المؤلف هيثم دبور أن فيلم ضي، تم إنتاجه بسبب الكينج محمد منير، حيث أشار إلى أن فكرة العمل تم بنائها على منير، وذلك خلال ندوة الفيلم، ضمن فعاليات مهرجان المركز الكاثوليكي للسينما في دورته الـ 74.

وقال هيثم دبور خلال الندوة : "الفيلم اتبنى على محمد منير، هو أول واحد كلمناه، وروحتله أنا وكريم الشناوي سوا، وعلى مدار سنوات التحضير كان دايمًا بيطمن على الفيلم ويشوف وصلنا لفين، هو صوت الرحلة الأساسي".

وواصل دبور : "بتأثر كل مرة وأنا بشوف الفيلم مع الجمهور، وكانت رحلة صعبة على جميع المستويات، والسيناريو أي حد هيقرأه هيشوفه مستحيل، وكان في جهات إنتاج تانية ناوية تنتج الفيلم ده لكن لصعوبته الإنتاجية، وصعوبة نجاحه في شباك التذاكر، اعتذروا قبل التصوير بأسبوع مثلًا".

وأكمل هيثم دبور : "ولأننا مؤمنين بـ ضي وأننا عايزين نشوفه على الشاشة، قررنا نشارك شركات إنتاج مصرية، مابقدرش أقول إنه فيلم استثنائي، ولكن كنت بقول لكريم مش هنعمله كل يوم فا يلا نتبسط".

وعن بداية التحضير للفيلم، قال هيثم : "السكريبت بدأنا فيه من 6 سنين، وكريم قرأه، وتحمسله جدًا مع إنه ماكنش مكتوبله أصلًا، ومن ساعتها بدأنا الرحلة الطويلة بتاعته، وزي النهارده كنا بنعمل كاستينج عشان ندور على شخصية ضي، والفيلم فيه رسايل كتير، ولكنه فيلم عن العيلة وعن الترابط بين أفرادها".

وحرص على حضور ندوة فيلم ضي، ضمن فعاليات مهرجان المركز الكاثوليكي بدورته الـ 74، كلًا من الفنان الشاب بدر محمد بطل الفيلم، الفنانة حنين سعيد، الفنانة إسلام مبارك، المؤلف هيثم دبور، والمخرج كريم الشناوي.