بعد جدل نقطة فرح مليون جنيه.. ياسمين عز: في طنطا بيعملوا الحلويات بماية الدهب

علقت الإعلامية ياسمين عز، على جدل قيام رجل في محافظة الغربية بتقديم نقطة بإحدى الأفراح بمبلغ مليون جنيه، قائلة: «الراجل نقط بمليون جنيه مستغربين ليه يعني في اي جماعه دي أقل حاجه عندهم دي أقل حاجه في الغربية والغربية عاصمتها طنطا». 

وأضافت، خلال برنامج كلام الناس المذاع على قناة إم بي سي مصر، «أقل راجل في طنطا بيجيب لمراته بـ 100 ألف جنيه مشبك و 5 مليون جنيه دهب وكاتبلها الشقة باسمها فمستغربين ليه». 

في طنطا محل دهب الحلويات

وأوضحت: « الراجل في طنطا كل يوم بليل بينزل يجيب لمراته بـ 2000 جنيه حمص كل ألف في كيس لوحده عشان مراته بتكون زهقانه بتقعد تقزقز في البلكونه». 

وتابعت: «عندهم في طنطا محل دهب الحلويات أو دهب للحلويات يعني بيعملوا الحلويات عندهم من مايه الدهب ويأكلوها لمراتاتهم عشان كده تلاقي ستات طنطا والغربية حلوين كده وبيلمعوا والست عندنا هنا جوزها بيعملها الشاي بماية المجاري». 

الست في طنطا بتصحى تبوس راس جوزها 

واستطردت: « الست في طنطا كل يوم الصبح تصحى تبوس راس جوزها وتحب على إيده وتقوله لو لم تكن طنطاويا لوددت أن تكون طنطاويا». 

وفي سياق آخر، قالت الإعلامية ياسمين عز، إن التوقيت الصيفي ابتدا فدلوقتي عندك ساعة زيادة هدية تلبسي فيها لجوزك خلخال وتدلعيه. 

وأضافت، خلال برنامج «كلام الناس» المذاع على قناة إم بي سي مصر، «لو عايزة تهبلي جوزك البسي خلخال وشخللي بيه في الشقة قلبه هيتشخلل شخاليل». 

ساعات النهار زادت ساعة

وتابعت: «ساعات النهار زادت ساعة بحالها وهذا معناه إنه الشمس بتهديكي ساعة زيادة تشوفي فيها عيون فرعونك العسلية في الشمس اللوزية وتبتدي تتملي فيهم شوية، وتشوفي إنعكاس ضوء الشمس على شعيرات جوزك المجعدة المجلدة وتقوليله كلمتين حلوين من نفسه من غزل ومدح وذم ونفاق تخليه يبتسم عشان تشوفي أسنانه اللولي اللي بتلمع في الشمس». 

وأوضحت: «الحياة فرص وانتي النهاردة الحياة اديتلك فرصة ساعة زيادة تحبي فيها جوزك وتدلعي فيها جوزك وتلبسيله خلخال فاعملي اي حاجه في الساعة الزيادة دي».