بعد واقعة فتاة سموحة.. مي فاروق تخرج عن صمتها: "ربنا ينتقم من اللي ظلمها"
خرجت المطربة مي فاروق عن صمتها بعد واقعة انتحار فتاة سموحة، وذلك من خلال منشور عبر حسابها الرسمي على موقع التواصل الإجتماعي فيسبوك.
مي فاروق تعلق على واقعة فتاة سموحة
وقالت مي فاروق معلقة: “كل من تسبب في ظلمها وقهرتها وتعبها هو اللي ربنا هيقتص منه وينتقم منه اشد انتقام، كل من وصلها لهذه المرحله الصعبه من التعب والضغط ورفض نفسها والحياه هو اللي لازم يتحاسب، اللي ضغط عليها وداس واذي وافتري وخلاها توصل لحتة نفسية مرعبة كده، الله يرحمها ويغفرلها ويسامحها ويصبر بناتها وينتقم لها من كل من اذاها وظلمها ووصلها لكده ربنا يثبتها عند السؤال، ادعوا لها بالرحمة وندعي لنفسنا بالرحمه فوق الأرض وتحت الأرض ويوم العرض عليه ماتحكموش علي الناس في ضعفها لأن كل حد فينا ممكن يضعف فيارب ثبتنا جميعا”.
انتقادات مي فاروق بسبب زواجها
في سياق آخر، قد ظهرت المطربة مي فاروق في لقاء خاص على منصة المشهد مع الإعلامي “محمد القس”، لتتحدث من قلبها عن الانتقادات التي طالتها وقت زواجها من الفنان محمد العمروسي.
حيث قالت مي فاروق في حديثها: “التعليقات كلها وقت زواجي كانت في حتة ما تعيشي تربي ولادك، مش عيب عليكي وعلى طول بنتك اللي واقفة جنبك أن أنتي بتتجوزي تاني، وكمان لابسة فستان فرح ده ايه البجاحة دي، ياسلام هو أنا واخداه من دولابكم، وكل ده شوفته يوم الصباحية زي ما بيقولوا، أنا مصر كلها بتتكلم عليا اللي بيهاجم واللي بيدافع واللي بيرد، وفي دكاترة نفسيين بيحللوا اللي بيتقال، واللي بيحللوا شخصيتي، أنا كنت محتوى غريب في الفترة دي، بقيت قاعدة بتفرج وأضحك، والمنشتات اللي نزلت وكسرتوا فرحتي ليه، أنا محدش يقدر يكسر فرحتي مادام أنا فرحانة ده غير أن أصلا مقولتش كده، أنا ولا اتكلمت ولا قولت حاجة غير أني اتجوزت وعملت فرح”.
“عملت حلال ربنا والجواز إشهار”
واستنكرت مي فاروق ما حدث من انتقادات قائلة: “أنا عملت ايه غلط، مش أنا عملت الصح والحلال واللي يرضي ربنا وولادي وعيلتي ويرضيني أنا والراجل اللي في حياتي، في حاجة عيب في حاجة فجة بتحصل، هو ربنا مقاليش أن من حقي ارتبط تاني، ربنا فرض عليا أني لو ارتبطت تاني ملبسش فستان أبيض، هو مش الزواج إشهار ولا ايه ما أهو إشهار أهو، أنا حرة ده موضوعي أنا ايه اللي يضايقكم، بقينا في مجتمع بيعلق على أي حاجة بتحصل، أنا عمري ما شوفت حد بيتشتم عشان عمل حلال ربنا والصح، كنت مايتة من الضحك يا جماعة أنتوا بجد ولا أنا اللي مجنونة".
