بكلمات راقية.. باسم يوسف يتحدث عن تجربته في بودكاست كانديس أونز
حل الإعلامي باسم يوسف ضيفًا على بودكاست كانديس أونز، وحرص على سرد تلك التجربة من خلال منشور عبر حسابه الرسمي على موقع تبادل الصور والفيديوهات إنستجرام.
باسم يوسف في بودكاست كانديس أونز
حيث قال باسم يوسف معلقًا: “كنت ضيف على بودكاست كانديس أونز، وبصراحة التجربة دي فتحت عينيّ على حاجات كتير، كانديس رغم وقوفها الواضح ضد اللوبي الصهيوني وإسرائيل، إلا إن ناس كتير بينتقدوها بسبب مواقف وآراء قديمة كانت معادية للعرب والمسلمين، غير كده، هي محسوبة على التيار اليميني، وليها مواقف مثيرة للجدل عند اليسار، وكمان عند جزء كبير من الأمريكيين السود بسبب اختلافها مع حركة Black Lives Matter.”
التعامل مع المختلفين سياسيًا
واستكمل باسم يوسف قحديثه قائلًا: "السؤال اللي دايمًا بيتكرر: هل ينفع نكلم ناس مختلفين معانا جذريًا سياسيًا، يمين أو يسار، لكن واقفين معانا في نقطة مصيرية زي سيطرة اللوبي الصهيوني المرعبة على مفاصل الدولة في أمريكا؟، كتير بيفضلوا ما يقربوش من “الناحية التانية” عشان ما يتحسبش عليهم إنهم موافقين على كل الخلافات دي. وأنا فاهم ده وبحترمه.
بس في الوقت اللي الصهاينة بيكلموا اليمين واليسار مع بعض، وبيشعلوا الصراع بينهم، إحنا بنقف عند فكرة “النقاء الأيديولوجي”، ونقفل على نفسنا، ونفوّت فرصة نوصل قضيتنا لدوائر عمرنا ما كلمناها، بعيدًا عن الكاميرا، كانديس إنسانة لطيفة جدًا، خفيفة دم، وطبيعية. اختلفنا في حاجات كتير، بس اتفقنا في نقاط جوهرية جدًا تخص اللي بيحصل في أمريكا والشرق الأوسط."
أراء كانديس أونز السياسية
وكشف الإعلامي باسم يوسف عن أرائها السياسية بوضوح قائلًا: “هي كانت صريحة بشكل نادر، واتكلمت بوضوح عن مواقفها القديمة، وعن إزاي هي وغيرِها من الإنفلونسرز في بداياتهم اتعرضوا لغسل دماغ حقيقي. واتكلمت كمان عن إزاي آراءها اتغيرت، خصوصًا فيما يخص فلسطين، وإسرائيل، والعرب والمسلمين، أنا عندي احترام كبير لأي حد عنده التواضع، والذكاء، والشجاعة إنه يراجع نفسه، ويواجه البرمجة اللي اتزرعت جواه سنين عشان تفضل مسيطرة عليه، ده مش ضعف… ده شجاعة. وده هو النمو الحقيقي، الحلقة فيها نقاشات مهمة جدًا: موقفي من تشارلي كيرك، السيطرة الصهيونية على صناعة القرار في أمريكا، تاريخ الكذب والخداع للدولة المجرمة المسماة إسرائيل، وطبعًا حبيب قلبي بن شابيرو، الحلقة جابت مليون مشاهدة في أقل من يوم، رغم إنها حوالي ساعتين. أرقام زي دي ما بقيناش نشوفها من بعد ما منصات التواصل لعبت في الخوارزميات وخلّت أصوات كتير شبه غير مرئية — وأكيد لاحظتم ده، بنحاول نترجم الحلقة للعربي بأسرع وقت، ياريت تشاركوها عشان توصل لأكبر عدد ممكن، للأسف، اللي فاضل لنا دلوقتي هو الكلام والتنفيـس والصريخ في الهوا”.
