ياسمين عز: خطيبك لازم يشتغل بلقمته.. خليه يصلح السخان والشفاط
قالت الإعلامية ياسمين عز، خلال تقديم برنامجها «كلام الناس»، المذاع على شاشة قناة «إم بس سي مصر»: «لو خلاص دخلتي خطيبك ونزلتيه من على كتفك جوه باب الشقة تحفة، خطيبك جالكم البيت يشتغل بلقمته بقى، والا هتتحسب عليه خطوبة والسلام؟، لا بعد ما تتخطبي خطيبك هيزوركم مرة في الأسبوع هي مرة كفاية مش مرتين ولا تلاتة».
خطيبك يعمل بلقمته
وأضافت:« خطيبك طول القعدة يفضل ياكل ويشرب ويمرح ويحلي ويحدق يقزقز ويمزمز ويتفرج على الماتش، لا خطيبك لازم يشتغل بلقمته وتستفيدي منه، خليه يصلح السخان والشفاط ويغير فيشة الدفاية ويغيرلكم اللمبة المحروقة لو بيفهم في السباكة خليه يصلح الحنية اللي بتنقط والحوض اللي بيسقط».
في وقت سابق، في حلقة جديدة من برنامج «كلام الناس» المذاع على شاشة «mbc مصر»، وجهت الإعلامية ياسمين عز انتقادات للزوجات اللاتي يطلن البقاء في منزل أهاليهن، معتبرة أن هذا التصرف يؤثر على راحة الوالدين ويسبب إزعاجا للأشقاء بسبب تصرفات الأطفال.
كلي واتكلي على الله
وبدأت عز حديثها بمطالبة الزوجة بأن تكون خفيفة في زياراتها، قائلة: «إنتي بتبقي قاعدة عند أهلك ليه؟ ما تتغدي وروحي.. اتعزمي، كلي وتنبسطي وتمشي، بلاش فكرة إنك تاخدي عيالك السلاحف وتباتي بالأسبوع، كفاية كده».
دفاع عن الخال والخالة
وانتقدت ياسمين عز تدخل الزوجات في شؤون أشقائهن الصغار ومحاولة فرض أطفالهن عليهم، معلقة: «طول ما انتي قاعدة بتأمري وتتأمري.. اغسلي لابني، سخني لبن لابني.. وخالتو أصلا زهقانة من الدنيا وعايزة تطفش، تروحي انتي قارفة خالتو بطلباتك؟».
وتابعت: «تزعلي وتتقمصي لو أخوكي اشتكى إن ابنك المقروض كسر البلاي ستيشن، أو أختك زعقت لبنتك عشان بتلعب في مكياجها اللي جايباه بجمعية؟ واجهي نفسك.. محدش طايقك ولا طايق عيالك».
جوزوكي عشان يرتاحوا منك
وأكملت ياسمين عز: «أهلك جوزوكي يا حبيبتي عشان يرتاحوا منك أصلا، مش عشان تجيبي لهم نسخ كتير أصغر حجما منك.. ولادك بيقلبوا البيت مرستان وبيوسخوا الأرضية، والست كبرت ومش قادرة.. سيبي أهلك يعيشوا في سلام، النسخ دي لازم تنقرض».
المفاجأة: مامتك هي اللي قالت لي
وفي ردها على التساؤلات المتوقعة حول سبب تدخلها، قالت ياسمين عز: «هتقولولي ويا ترى انتي مالك يا ياسمين؟.. هقولك مامتك هي اللي اشتكت لي منك، قالت لي اتكلمي يا ياسمين، مامتك هي اللي شكت لي من عمايلك وعمايل عيالك.. نقطة».
