جاهز ترفعوا عليا قضية.. نادر أبو الليف يثير الجدل بعد حديثه عن مذيعة مشهورة
أثار الفنان نادر أبو الليف الجدل خاصة بعد الحديث عن أزمته مع مذيعة شهيرة، وفي أول تعليق منه خرج عن صمته ليهدد كل من تدخل في أزمته وتحدث عنه بشكل لا يليق، وذلك من خلال منشور عبر حسابه الرسمي على موقع التواصل الإجتماعي فيسبوك.
نادر أبو الليف يرد على الهجوم الذي تعرض إليه
وقال نادر أبو الليف في منشوره: “السلام عليكم ورحمة الله وبركاته إلي كل من إتريق وقال عليا أي كلام فاضي ومقدرش ولا فهم مقصود البوست، وعمال يهري ويهبد وبيزيد عايز اقولهم عيب وكل واحد يلزم حدوده ويحترم نفسه، علشان المفروض إنكم ناس مثقفة وناس بتفكروبتقدر وبتفهم، واللي بيقول إن أنا بشهر بالمذيعة وعايز يرفع قضية هترفع قضية علي إيه يا ناصح إخواتك، أنا لا قولت أي شئ يدل على هي مين يبقي هترفع قضية علي إيه بلاش هبد، وعيب عليكم لأن أنا لو عايز اقول هي مين كنت قولت وعرفتكم وأي رد فعل منها أنا قابل وموافق، وأي حد عايز يرفع قضية علي البوست إللي نزلته أنا جاهز جدا بس لو خسرتوا القضية أقسم بالله ما هتصعبواااا علياااا ومش هتنازل وهاخد حقي بما يرضي الله ثم بالقانون، علشان كل من تسول له نفسه يعرف قبل ما يخطي أي خطوة ويتقي الله لان أنا والحمد لله ماشي جوا الحيط ولا ليا في اليمين ولا في الشمال ولا ليا في اللف والحوارات اللي بتقولوا عليها لأن العمر عدي وفات ولا يبقي منه غير القليل والحمدلله راضي بكل ما مريت بيه في حياتي وفي دنيتي”.
واختتم نادر أبو الليف منشوره قائلًا: “وارجوا يكون كلامي إتفهم واوضحت الصورة وممكن يكون اللي كتبته غير مقصود بالمعني اللي وصل لكم، ولكن أنا غير مسؤل عن تفكيركم وضمائركم لأن فيه ربنا هو اللي في الآخر هنقف كلنا قصاده وهنتحاسب، وأنا راضي كل الرضي، واشكركم وأسف علي الإطالة”.
أزمة نادر أبو الليف مع مذيعة شهيرة
أما عن أزمته مع المذيعة الشهيرة، فقد أوضح نادر أبو الليف كافة تفصايلها دون أن يكشف عن اسمها من خلال منشور عبر حسابه الرسمي على موقع التواصل الإجتماعي فيسبوك.
وقال نادر أبو الليف: “مساء الخير علي كل حبايب قلبي اللي متابعين، عايز اقول علي مذيعة شغالة في قناة فضائية، اول حرف من اسمها ( N)، وساكنة في الرحاب، كنا أصحاب مقربين جدا جدا جدا وبعد لما اخدت غرضها مني، عملتلي حظر تخيلوا قلة الأصل والوطيان ولو مفكتش الحظر هقول علي إسمها والقناة اللي شغالة فيها وإسم البرنامج علشان بمزاجي، لكن تفتكري إنك مفتحه واخدتي اللي إنتي عايزاه مني وضحكتي عليا، فا اهون عليا أقول كل حاجة وأنا راجل مافيش حاجة تعبني، وعندها ولد اول حرف من اسمه (ي)، أنا منتظر وعامل بأصلي وبالعيش والملح وهنزل كمان صورة لينا لو ما شالتش الحظر وهيبقي كل حاجة علي عينك يا تاجر أنا مش بهدد ولكن بعمل إللي عليا قبل لما أخد أي خطوة وإللي عايز يعرف مين هيا يكلمني علي الواتساب وشكرا”.
