سيدة تشيد بوزارة الداخلية: تفاعل سريع مع الشكاوى وحسم الأخبار المغلوطة
أشادت "نور محمد" بجهود وزارة الداخلية، ومدى متابعتها لمواقع التواصل الاجتماعي ورصدها لأي استغاثات، أو أخبار مزيفة والرد عليها، واتخاذ الإجراءات القانونية ضد المخالفين.
وقال نور عبر حسابها على فيسبوك: الشرطة المصرية وصل بيها الحال أن في واحد نزل تحذير مكتوب على جروب من جروبات الشكاوي أن فيه عربية ربع نقل كانت بتجري وراه وبينزل منها ناس بيحاولوا يعتدوا عليه في مدخل مدينة بدر وفضلوا متتبعينه وهو كان معاه مراته واخته وابنه وكان خايف عليهم جدا وقعد يحكي ويحذر واد إيه كان مرعوب وخايف وهم يصوتوا من قطاع الطرق دول.
وتابعت بطريقة ساخرة: هوب دابل كيك الشرطة تشوف البوست تبحث الموضوع، تجيب اللي كاتبه وترفع الكاميرات وتشوف الواقعة تلاقي ان كل الكلام فشنك ومن خيال المؤلف قصدي اللي كتب البوست، ويطلع الموضوع خناقة هبلة بينه وبين سواق الربع نقل، خناقة بالكلام مش أكتر وكل واحد راح لحالة.
وأردفت نور محمد: يعني لا فيه قطع طريق ولا فيه تتبع ولا الرعب والذعر اللي نشره الأستاذ ورعب سكان مدينة بدر واللي البوست بتاعه سمع جامد واتشاف من الفات الناس وهو لما اتجاب اعترف أن الموضوع مفيهوش قطع طريق ولا تهديد !
ودلوقتي الراجل وسواق العربية النقل اتحولوا للنيابة عشان يكملوا الإجراءات القانونية .
خلوا بالكم من كلامكم والفيديوهات اللي بتصوروها والكلام اللي بتقولوه على الملأ الناس دي مبتهزرش وكل كلمة وفعل خارج القانون هاتتحاسب عليهم !
واختتمت حديثها قائلة: بجد الداخلية عاملة شغل جبار وناقص تنزل من الحنفية عشان تطمن أن المواطن بخير وفي أمان.
