أصدق اللقاءات .. محسن جابر يشيد بحلقته مع الإعلامية أسما إبراهيم في حبر سري
أشاد المنتج محسن جابر بالإعلامية أسما إبراهيم ، وذلك بعد حلقتهما من برنامج حبر سري في رمضان الماضي .
ونشر محسن جابر فيديو من الحلقة ، علي الحساب الرسمي له عبر موقع التواصل الإجتماعي فيسبوك ، معلقًا :"من أحلي وأصدق اللقاءات ..كان كلامي من القلب ..تحية للمذيعة المتألقة أسما إبراهيم وتحية للسادة المستمعين اللي إستحملوا حديثي".
وقال محسن جابر خلال لقاءه مع أسما إبراهيم متأثرًا :" أنا كنت في إحدي الشركات الكبيرة اللي باعت تراث الأفلام ، وأنا كنت عضو مجلس إدارة وأنا الوحيد اللي كنت رافض ، من بين مجلس إدارة 12 واحد ، ونزلت عملت محضر في قسم الشرطة ، إن في تراث مصري في أفلام السينما بتتباع ، وعملت مشكلة كبيرة جدًا ، ويمكن معظمهم كرهوني من بينهم رجال أعمال في مصر بدون ذكر أسمائهم ، بس أنا الوحيد كنت معترض ، وباعوني .
وأضاف : أنا كنت عملت سواب يعني دخلت شركتي بداخل شركتهم ، وهما باعوا الحدوتة دي كلها لشركة خليجية ، وبقدرة ربنا أنا خرجت من الشركة الخليجية دي ورجعت شركة مستقلة ، ودا سبب أني حصلت علي كل التراث دا.
محسن جابر يحافظ علي الفن المصري
وتابع محسن :"ودلوقتي بيقولوا محسن استولي علي التراث ، لا أنا حافظت عليه وكمان حافظت عليه للدولة مش بس ليا ، وإنما مين اللي يجيب الأفلام المصرية اللي راحتى للخليجية ، إشمعنا أنا ، يعني إشمعنا أنا اللي السهام كلها جاية عليا عشان أنا في لحظة من اللحظات كنت خايف علي الفن المصري .
وإستكمل :"ليه النهارة الكل بيقطع في محسن جابر ، يعني ممكن أقول إن أصعب فترة بمر بيها من فترات حياتي ، إني بتصارع مع نفسي ، هل أنا ندمان ولا أنا كنت علي صح ، وبعد ما أنا هعدي وأروح هيقولوا محسن جابر كان عمل وكان حافظ بس هيكون فات الأوان .
محسن جابر يكشف عن المجهود الذي بذله تجاه هذا التراث
أنا كنت أتمني إني أكون عملت حاجة عظيمة ، بس العكس مش مظبوط ، محدش مقدر ، وكله فاكر إن محسن إستحوز علي كل التراث ، الراجل بيتمتع لوحده ، مش فاكرين إني أخدت التراث ده نضفته وعملت مجهود كبير جدًا ونقيته في أحد الدول الأوربية ، عشان يكون ظاهر بشكل نقي للأجيال القادمة ، ومحدش بص لكدا ، ولا شركات القطاع العام ولا الوارثين ، مش بس وارثي أم كلثوم ولا وارثي عبد الحليم .
وختم محسن جابر :" كله بيقول بعد ما محسن وصل ، نحاول نضغط عليه أو نساومه ، وأنا حقيقي تعبت ، متعبتش طول حياتي ال50 سنة ، قد ما تعبت أخر سنتين دول".
