أحمد موسى: منتخب 2005 فاشل.. وأداء الفراعنة في كأس العرب لا يليق
قال الإعلامي أحمد موسى، غضبه من أداء المنتخب الأول لكرة القدم في بطولة كأس العرب 2025، قائلًا: طيب منتخب 2005 فاشل، وحلمي طولان وأحمد الكاس في مين تاني، حتى بيراميدز قال إزاي أديك لاعيبة، الله! هو ده وضع ينفع في بلد زي مصر!.
وواصل، خلال تقديمه برنامج على مسؤوليتي: بكلم كل المسئولين في الرياضة من أول وزير الشباب وأحمد دياب وهاني أبو ريدة وحسام حسن، ولو سمحتم محدش يقولي بطولة ودية.
وأردف الإعلامي أحمد موسى: لو ودية مكنتش روحت من الأول، ومحدش يقولك لجنة لأن دي أفشل حاجة وكده أنت بتطرمخ على الحاجة وتحطها في الدرج.
وتابع موسى:" روحنا كأس العرب، بمنتخب تعبان وشويه مكسحين، مفيش كورة، ألف باء رياضة مش موجودة، أول ماتش الكويت قولت المنتخب ده لازم يرجع النهاردة، ما يكملش، يوم الإمارات، النهاردة قولت يمكن، أنا عارف قوة منتخب الأردن، المنتخب الللي فاز علينا النهاردة ده التاني، لو الأول كان بيلاعبنا، كان فاز علينا 6، 7، الأردن هيعمل شغل كويس في كأس العالم.
الناس ملهاش علاقة بمنتخب أول وتاني
وأضاف:"ناصر ماهر فين، طاهر محمد طاهر فين، الناس ملهاش علاقة بمنتخب أول وتاني، الناس ليها علاقة بمنتخب مصر، دي سمعة مصر، فين المنظومة، مين اللي بيتكلم عن سمعة البلد، بوجه كلامي لكل المسؤولين من وزير الشباب والرياضة لأصغر مسؤول، مكنتش تروح، هتقولي لجنة، مفيش حاجة اسمها لجنة.
منتخب محترم
وتابع:"باين من دلوقتي، ليه معملتوش منتخب محترم مع بعض يروح الدوحة، كل واحد خد الحتة بتاعته، وراح بيها، آلاف رايح يشجعوا بيعيطوا واحنا بنعطي، أنا ما اشوفتش كورة من بعد حسن شحاته ربنا يديه الصحة، اللي لاعب البرازيل وايطاليا، عندنا صلاح، ومرموش، ومصطفى محمد".
وعبر موسى عن حزنه وغضبه الشديدين من الأداء الباهت للمنتخب الوطني في بطولة كأس العرب، مؤكدًا أنه يعكس مشاعر "الشعب اللي زعلان ومقهور".
نقد لاذع للأداء و"الخروج المهين"
انتقد موسى، فشل المنتخب في تحقيق أي فوز بالبطولة، متسائلًا بمرارة: "نتفرج على الكورة في مصر عشان دمك يتحرق؟ إحنا مش عارفين نفوز ماتش في كأس العرب".
ووجه كلامًا قاسيًا للمدرب حلمي طولان، الذي صرح بأنه لم يجد الدعم من المسؤولين، قائلًا: "لما أنت محدش بيدعمك ليه روحت البطولة، وكنت طلعت وأتكلمت ولا جاي تقول دلوقتي بعد الخروج المهين؟".
