خدت درس ومش هكرر الخطأ .. أول تعليق من إسلام كابونجا بعد التحقيق معه|خاص
خرج مؤدي المهرجانات إسلام كابونجا، في أول تعليق له، بعد التحقيق معه في مقر نقابة المهن الموسيقية منذ قليل.
أول تعليق من إسلام كابونجا بعد التحقيق معه في مقر نقابة الموسيقيين
وأشار كابونجا خلال لقاء خاص مع موقع “نيوز رووم” أنه أخذ درس كبير خلال التحقيق ولن يكرر الخطأ الذي وقع به، حيث قال : “اللي حصل في التحقيق إني خدت درس ومش هيتكرر الخطأ تاني بإذن الله .. والخطأ اللي حصل ده مش مقصود .. وهستغل الفرصة دي واتأسف لأي حد سمع مني كلمة وحشة .. واللي حصل ده مش هيتكرر تاني وهتشوفو إسلام بشكل تاني”.
وتابع : “وأحب أشكر اللجنة لأنه كانوا رءوفين بيا وشايفني زي ابنهم .. وأكيد محدش هيخسر أكل عيشه خالص ويعمل زيي مهما كان مين .. والنقابة دي بيت أي موسيقي .. وأستاذ مصطفى كامل عداه العيب معانا وحذرني كذا مرة بس الغلط ده كان غير مقصود”.
وأكمل إسلام كابونجا : “الفيديوهات اللي نزلت كانت قديمة بس رجعت تظهر .. وأنا همسح كل ده .. واللي حصل هيخليني إسلام تاني وهركز في الكلمة اللي بتتقال بعد كده .. وفي انتظار قرارات النقابة ولجنة التحكيم اللي هتطلع في بيان رسمي”.
واختتم كابونجا : “بوعد الجمهور وأستاذ مصطفى كامل اللي هوا أب لينا كلنا .. إننا مش هنسمع كلمة زي مطوة وأي كلمة خادشة في أغانيا”.
وصول إسلام كابونجا لمقر نقابة الموسيقيين
وكان قد وصل إسلام كابونجا، منذ ساعات قليلة، إلى مقر نقابة الموسيقيين، للتحقيق معه، وظهر مرتديًا كمامة ومتأثرًا، حيث قال قبل دخوله التحقيق : "ربنا كبير .. ادعوا لي”.
تعليق إسلام كابونجا على منعه من الغناء
وكان قد خرج إسلام عن صمته مؤخرًا، عندما تحدث في بث مباشر، عبر صفحته الرسمية على فيسبوك، عن أزمة منعه من الغناء.
أي حاجة تصدر من النقابة على دماغي
وقال إسلام : “عايزكم في موضوع كده بالنسبالي حياة أو موت، طبعا كلنا شوفنا الخبر اللي نزل أن أنا اتوقفت، أي حاجة تصدر من النقابة على دماغي، بس اقسم بالله العظيم وهحلف على المصحف وغلاوة بنتي الأغاني دي قديمة”.
الأغاني دي قديمة
وواصل : “وفي ناس أخواتي ياما اتسألوا هل تؤيد القبض على إسلام كابونجا، وناس مني وناس بتسمعني وناس بحبها كاتبين نعم نؤيد، أي حد يؤيد فوق دماغي، بس الأغاني دي قديمة، وحسبي الله ونعم الوكيل في أي حد بينزلي فيديوهات قديمة عشان يرازيني في أكل عيشي، ورزق بنتي”.
وأضاف كابونجا : "أنا عندي تحقيق كمان شوية عادي أي حاجة تصدر في التحقيق فوق رأسي، أنا غلطان ، بس والله الأغاني دي قديمة، الناس اللي بتسمعني هتعرف القديم من الجديد، الأغاني من الصيف اللي قبل اللي فات”.
بكاء إسلام كابونجا بعد قرار منعه من الغناء
واختتم إسلام كابونجا حديثه باكيًا، وقال : “عموما الناس اللي عايزاني اتوقف أنا اسف ليكم لو أنا سمعتكم حاجة مش عجباكم، الحاجات دي قديمة واتحسبت عليها خلاص، الناس اللي شايفاني وحش متعاملوش معايا وبيحكموا عليا من بعيد، في ناس ياما رزقها هيتقطع بس أنا كفيل بيهم طول فترة وقفي، وأيف لو سمعتكم حاجة وحشة بس أنا اتغيرت وناس كتير سمعتكم حكاجات وحشة واتغيرت”.
