مصطفى بكري: إحنا بلد كتير بيحسدونا ويقولوا مصر إزاي بقت كده؟
قال الإعلامي مصطفى بكري “إحنا النهارده بلد في حتة تانية، إحنا بلد الكثيرون بيحسدونا، بيقولوا مصر إزاي بقت كده في السنوات دي، إحنا عشنا في فترات تاريخية، إحنا عارفين إن جوه البلد دي أعداء، وناس مش عايزه البلد، إن فيه ناس مش عايزة الحكم، وناس بتدور على مصالحها”.
بكري: إحنا بنقول اللي في قلبنا ومش خايفين من حد
وأضاف، خلال تقديمه برنامج حقائق وأسرار، والمذاع عبر قناة صدى البلد "إحنا بنقول اللي في قلبنا ومش خايفين من حد، إحنا خايفين على بلدنا، ووطننا، وعايزين البلد دي تقف على رجليها بجيش وشرطة وقيادة سياسية، وبكده هنقدر نعدي، غير كده، إحنا مستهدفين، وخلي بالكم من الخطر، الخطر قائم من كل اتجاه".
وتابع:" إحنا في الأزمات صوتنا بيبقى عالي، ومنحازين مع الشعب، في قانون الإيجار كان صوتنا مع الشعب، في مواجهة المؤامرات كان صوتنامع الشعب، في مواجهة التحديات اللي بتواجهنا كنا مع الشعب ومع الدولة، صوتنا مع الدولة مش معناها إنك بتطبل، لا لا أنت بتدافع عن بلدك.
وواصل "لما بنبقى مخنوقين من حاجة بنتكلم، إحنا ورا القيادة السياسية، والبلد دي لازم تكمل وتفضل واقفة ع رجليها، ولما بيكون فيه خطأ بنقول، ويا حكومة عدلي في المسار ده، لكن مش هنطلع نقول الدنيا سودا، ومش هنزايد على مصر".
وقال : "هناك خطة للبلد دي علشان تبقى زي دول تانية واقعة، والبلد دي مش هتقف إلا بيك وبيا، وبموقف موحد، خلف مؤسسات الدولة والقيادة السياسية، وفيه ناس بتعارض، وليس كل المعارضين خونة، بالعكس في ناس بتعارض من منطلق وطني، وفيه ناس بتقدم نفسها كمعارضة ، ولكن بيشتغلوا كأرجوزات زي ناس كتير في دول برة".
بكري: "بلدنا محتاجنا كلنا"
وتابع قائلًا:"بلدنا محتاجانا كلنا، فيه أخطاء آه فيه مشاكل آه، فيه أوضاع صعبة، فيه زيادة أسعار بننتقدها، لكن فيه وضع اقتصادي بيتحسن على مستوى الاحتياطي الاستراتيجي وتراجع مستوى التضخم".
واختتم بأن “الدنيا مش حلوة ومش وردية، لكن البلد واقفة على رجليها، البلد اهتمت بالصناعة والنقل، نحن بننتقل من مرحلة لأخرى، إحنا بنتكلم اه، ممكن نكون مش بنقول كل اللي إحنا عايزين نقوله بس بيبقى حرصنا ع البلد دي، واستمرارها”.
