مصطفى بكري: "صوتك مع الدولة مش معناه إنك بتطبل.. إنت بتدافع عن بلدك"
قال الإعلامي مصطفى بكري "إحنا في الأزمات صوتنا بيبقى عالي، ومنحازين مع الشعب، في قانون الإيجار كان صوتنا مع الشعب، في مواجهة المؤامرات كان صوتنامع الشعب، في مواجهة التحديات اللي بتواجهنا كنا مع الشعب ومع الدولة، صوتنا مع الدولة مش معناها إنك بتطبل، لا لا أنت بتدافع عن بلدك".
وأضاف، خلال تقديمه برنامج حقائق وأسرار: "لو بنبقى مخنوقين من حاجة بنتكلم، إحنا ورا القيادة السياسية، والبلد دي لازم تكمل وتفضل واقفة ع رجليها، ولما بيكون فيه خطأ بنقول، ويا حكومة عدلي في المسار ده، لكن مش هنطلع نقول الدنيا سودا،ومش هنزايد ع مصر".
وتابع: "هناك خطة للبلد دي علشان تبقى زي دول تانية واقعة، والبلد دي مش هتقف إلا بيك وبيا، وبموقف موحد، خلف مؤسسات الدولة والقيادة السياسية، وفيه ناس بتعارض، وليس كل المعارضين خونة، بالعكس في ناس بتعارض من منطلق وطني، وفيه ناس بتقدم نفسها كمعارضة ، ولكن بيشتغلوا كأرجوزات زي ناس كتير في دول بره".
بكري: :"بلدنا محتاجنا كلنا"
وأضاف، خلال تقديمه برنامج حقائق وأسرار، والمذاع عبر قناة صدى البلد: "بلدنا محتاجانا كلنا، فيه أخطاء آه فيه مشاكل آه، فيه أوضاع صعبة، فيه زيادة أسعار بننتقدها، لكن فيه وضع اقتصادي بيتحسن على مستوى الاحتياطي الاستراتيجي وتراجع مستوى التضخم".
وواصل: “الدنيا مش حلوة ومش وردية، لكن البلد واقفة على رجليها، البلد اهتمت بالصناعة والنقل، نحن بننتقل من مرحلة لأخرى، إحنا بنتكلم اه، ممكن نكون مش بنقول كل اللي إحنا عايزين نقوله بس بيبقى حرصنا ع البلد دي، واستمرارها”.
وأكد الإعلامي وعضو مجلس النواب مصطفى بكري أنه يأمل أن يشهد البرلمان القادم استجوابات قوية تُعبّر عن الرقابة الحقيقية داخل المجلس، قائلًا: «البرلمان السابق كان به استجوابات لم يتم مناقشتها».
تنسيق بين المعارضة والقوى الداعمة
وفي وقت سابق قال "بكري"، خلال حواره مع الإعلامي خالد أبو بكر في برنامج «آخر النهار» المذاع على قناة النهار: «أتمنى أن يكون داخل البرلمان تنسيق بين المعارضة والقوى الداعمة للحكومة تجاه القضايا الوطنية العامة».
وأضاف: «أنا طالبت بتغيير الحكومة وأنا داخل البرلمان، ومفيش حد اعترض أو قالي أنت بتقول إيه».
