«من أدخل التكييف مصر».. حكاية والد الدكتورة سهير العطار في «ست ستات»
كشفت الدكتورة سهير العطار، أستاذة الطب وبطلة العالم في السباحة، عن جانب من حياتها الشخصية ، مؤكدة أنها نشأت في بيت بسيط لكن مليء بالتشجيع والإصرار، قائلة: «والدي ووالدتي مكانوش رياضيين، لكن كانوا مؤمنين إن الرياضة مهمة ولازم نلعب من وإحنا صغيرين، وكانوا بيعملوا مجهود جامد علشان يشجعونا ويدخلونا المجال ده».
أوائل من أدخلوا فكرة تكييف الهواء إلى مصر
وأضافت العطار خلال لقائها ببرنامج «ست ستات» المذاع على قناة DMC من تقديم الإعلامية سناء منصور، أن والدها كان مهندسا بارعا ومن أوائل من أدخلوا فكرة تكييف الهواء إلى مصر، موضحة: «بابا كان معيد في الجامعة، وبعد كده استقال لما صاحبه عرض عليه فكرة التكييف، وكان معاه المهندسين الطاهري وأنور العطار، ودول أول مجموعة بدأت المشروع في مصر، وكنت دايما أقول لصحابي لما الجو يحرر اقرأوا الفاتحة لبابا اللي دخل التكييف البلد».
وتابعت بطلة العالم حديثها عن بدايتها في السباحة قائلة: «أنا بدأت السباحة من نفسي، محدش وجهني، بس كنت بحب الميه جدا، ولما دخلت المجال لقيت نفسي فيه، والرياضة كانت سبب في تكويني كشخص وكدكتورة، لأنها علمتني الالتزام والتحدي والإصرار».
وفي سياق آخر، قالت الفنانة دنيا عبد العزيز إن عائلتها كانت تدللها كثيرًا في طفولتها، لكنها كانت تخشى نظراتهم عند ارتكاب أي خطأ، مؤكدة أن أكبر عقاب بالنسبة لها كان زعل جدتها لأنها الأقرب إلى قلبها.
أكبر عقاب ليا
وأوضحت دنيا عبد العزيز، خلال لقائها في برنامج "ست ستات" المذاع على قناة DMC: «أهلي كانوا بيدلعوني جدًا، بس لو بصولي بصة بخاف على نفسي، وأكبر عقاب ليا إن جدتي تزعل مني لأنها غالية عليا جدًا ومقدرش أستغنى عنها، وبصالحها دايمًا بسماع كلامها، كنا عايشين علشان نسعد بعض».
بدأت التمثيل منذ طفولتها
وعلقت دنيا عبد العزيز على صورة جمعتها بالفنان الراحل سمير صبري، قائلة: «كان من أوائل الناس اللي قالوا عني إن دنيا هتمثل، وهو فعلًا مكتشفني، وكان من أصدقاء العيلة المقربين»، مشيرة إلى أنها بدأت التمثيل منذ طفولتها بدعم وتشجيع أسرتها: «كنت لما أشوف أغنية في التليفزيون أغطيه وأقلد الدور كأني على المسرح، ولما يشوفوني في البيت يصقفولى ويشجعوني».
