المطرب مسلم: فلوسي قربت تخلص ومش عارف أصرف على بيتي
كشف مطرب المهرجانات مسلم أنه لا يجد مصدر دخل بسبب إيقافه عن العمل ومنعه من الغناء منذ أكثر من 8 أشهر، مؤكدا اعتزامه السفر خارج مصر، وبيع ممتلكاته.
وقال مسلم خلال فيديو على صفحته بموقع فيس بوك: قررت امشي من البلد وهبيع كل حاجة في الشقة وهتكل على الله لأني مش عارف أمارس شغلي، ولأني مش عارف اشتغل في بلدي، وهبدأ من بكره أشوف حد يشتري حاجتي، ومش عاوز أي حاجة تاني، أنا اتعرضت لظلم كبير من منتج ومن ناس ومن أهل ومن نقابة، وبقالي سنة مش عارف أصرف على بيتي وناس معايا في الفرقة فيهم اللي بيغسل كلى وأنا مش قادر أساعدهم ومفيش حاجة في ايدي اعملها وفلوسي قربت تخلص وكسرة الرجال صعبة.
وتابع مسلم: هسافر مدام مفيش أمل والعيب مش في المحكمة ولا في بلدي العيب في الناس اللي بتقدر تمشي كل حاجة بدماغها وبالواسطة وترشي الناس، فانا قررت أمارس مهنتي بره طالما مش قادر أحقق حلمي في بلدي.
وأكل مطرب المهرجانات: اللي كان بيتمنى اني أتدمر انبسط أنا اتدمرت بما فيه الكفاية، وأنا كده كده كنت عارف اني هتحارب لحد آخر يوم في عمري، وفي ناس أقوى من أي حد بيدوسوا على غيرهم، ويقعدوهم في بيوتهم ويجيبولهم أمراض.
