عندي أمل نعوض في كأس العالم.. كريم سرور ينتقد حفل افتتاح المتحف الكبير
خرج الفنان كريم سرور عن صمته، وذلك بعد كم الانتقادات والهجوم على مخرج حفل افتتاح المتحف المصري الكبير، الذي أقيم مساء أمس، وذلك من خلال منشورًا عبر حسابه الرسمي على موقع تبادل الصور والفيديوهات إنستجرام.
اختيار الكادرات المناسبة
وقال كريم سرور في منشوره: "طب أنا عايز أقولك إيه بقى من القصة الظريفة دى .. إن إختيار الكادرات المناسبة فى اللحظة المناسبة هى أساس الشغلانة كلها ، بكرر تانى " الكادرات المناسبة “ المناسبة يا جماعة مش المبهرة، لأنه بطبيعة الحال كل الكادرات مبهرة بسبب إحترافية المتخصصين فى كل قسم ( الديكور والإضاءة والمزيكا واللبس والرقص ) كل العناصر تمام ، الفكرة فى كيفية تقديمها وعلاقتها ببعضها ، عشان كدة بقول المناسبة وليس المبهرة ، لأن ده بس اللى هيحقق التدفق البصرى واللى هيخليك تحس بالمعنى اللى المفروض يوصلك ، ومع ذلك أنا لا أقول أن الحدث كان غير لائق ، بالعكس ، الحدث والإحتفالية كانوا على مستوى عالى فى التجهيز والتصميم وذلك ما يبدو للأعمى ، لكن هذا عمل يليق بنا كحدث فقط ، ليس حدثاً عالمياً على الإطلاق ، هذه محلية التفكير التى أغرقت كل سفينة حاولنا بناءها ، هل تعتقد أنه سيتم الإستعانة بنا كفريق مصرى متخصص ومبدع لأى بلد فى العالم لتنفيذ إحتفاليات كبيرة ومهيبة ، يستحيل حدوث هذا يا سيدى ، المهم يعنى مبروك وكل حاجة واللى حصل حصل تعالى بقى نتكلم فى البرنامج نفسه”.
نقص الإنفوجرافيك
واستكمل كريم سرور حديثه قائلًا: "ينقصنا الإنفو جرافيك بطريقة رهيبة ومُلِحّة، اصدقائنا الأجانب كل شوية بيسألوا ايه ده ؟ فين ده ؟ إسمه إيه ده ؟ طب ما تكتبوا يا جماعة ، القلعة ، اهرامات الجيزة ، معبد الأقصر ، معبد الفيلة ، مقابر النبلاء ، أسوان ، نهر النيل ، الناس مش عارفة يا جماعة والله ، وكل مشاهد أحنبى هو سائح محتمل طبعاً ووسيلة دعاية محانية ، مثلاً ولنفترض عدد القطع الاثرية ٦٤٠ الف مثلاً "بقول مثلاً والله العظيم" وده اول متحف فى العالم بيضم عدد القطع دى ، يبقى ترسم بالدرونز عدد القطع ، كدة كدة هو سيستم وشغال سينسورايزد ، يعنى بتديله الشكل وهو بيرسمه مش بنطير نعلقهم درون درون يعنى ، وحط جنبه يا سيدى بقى حراس واقفين ، عجلة حريبة ، وش عنخ امون ، براحتك ، المهم وصل المعلومة اللى المفروض توصل ، ده إنت كل شوية تنزل إسم المقاطع الموسيقية اللى بتتلعب هى دى معلومات أهم من محتوى المتحف مثلاً أو المواقع الأثرية ، انت عايز تقول للعالم كله اننا عندنا اثار يعنى !! ماهما عارفين يا صاحبى والله".
الاستعراضات
وتطرق كريم سرور إلي الاستعراضات التي تم عرضها خلال الحفل، حيث قال:" أما بالنسبة للإستعراضات اللى ملهاش أى دلالة واضحة دى فهى خذلتنى جداً ، وبالذات اللى كانوا ماسكين البلورات المضيئة دى ، أول حاجة بدأت تتسرسب لمخى إننا بدأنا نعبث هما دول ، حسيت بنغصة فى قلبى كدة منهم ، وحتى زاوية تصويرهم ، حقيقى مش فاهم بيعملوا إبه والحركات العصبية الغريبة اللى بيعملوها وهما بيرقصوا توتر جداً .. جداً .. والقطع عليهم مكنش مفهوم برضه ، عايزين نتخلص بقى من متلازمة فوازير رمضان دى يا شباب ، وعندى تحفظ كبير أوى على إختيار الكادر اللى كان واقف فيه الريس وبيرحب بالضيوف مكنش مناسب وضعيف بصرياً وإضاءته مش حلوة ، غير الأغانى المتنوعة سيئة الحضور والنغمة".
مشاركة النجوم الشباب
وبالنسبة لمشاركة نجوم شباب في الافتتاح، قال كريم سرور: “نجومنا الشباب معرفش الهدف من وجودهم إيه غير انهم نجومنا الشباب بس مش قادر احدد الهدف برضه بشكل موضوعى مش إحتفالى فقط ، أما ختام الحفل حدث ولا حرج ، القفلة بتاعة سحبة الكرين اللى بنعملها فى الاخر دى هى حلوة اه بس مبتتعملش كدة ، عشان مبقتش بتتعمل أصلاً ، انا عندى سحبة زيها كدة فى حفلة من ١٢ سنة كل ماشوفها اقول يااااا على السذاجة اللى كنت فيها ، ده انا كنت ممكن اعمل بقى مش عارف ايه وإبه وإيه ، هى حلوة فعلاً بس قديمة أوى من أيام حفلات ليالى التلفزيون ، اللى هو يلا نطلع توتالة بقى عشان ننزل بالكريديت، لأ يا صديقى مش كدة خالص ، إحتفالية زى دى لازم يكون ليها بداية ونهاية واضحين جداً ويردوا على بعض كمان مش كل حتة مستقلة بذاتها ، بصوا يا جماعة العملية طويلة ومعقدة والكلام فيها مش هيخلص”.
ظهور لقطة عصام السقا
واختتم الفنان كريم سرور حديثه بالتعليق على ظهور لقطة عصام السقا، حيث قال: “أما بخصوص الإنسيرت إياه اللى كلكم بتتكلموا عنه أنا بقى مش هتكلم عنه، المخرج حر يقطع على اللى هو عاوزه ملناش دعوة إهنا يا موهيى ، مش هو ده اللى بوظ الحفلة يعنى متبقوش ضيقين بقى يا جماعة ، فى النهاية حابب أقول إن توظيف الإبهار لتوصيل المعنى أهم بكتير من الإبهار لوحده كدة ،وبالذات فى حدث بالحجم والأهمية دى ، عموماً مبروك لبلدنا الحبيبة مصر وعقبال كاس العالم . عندى أمل نعوض فيه .. هتقولى بقى وإنت مالك أصلاً ومال الكلام ده انت عايز تهرى وخلاص !! مش إنت يابنى ممثل ومؤلف باين ؟ هقولك معلش ماهو أصل اللى ميعرفش يقول عدس ، خليك بقى فى العدس بتاعك وسبنى فى حالى ، عيش وسيبنى أعيش يا كابتن، والسلام عليكم .”
