مصلحة اللاعب أهم من الأهلي.. كريم رمزي يعلق على أزمة إمام عاشور
علق الإعلامي كريم رمزي على تصريحات وكيل اللاعب إمام عاشور نجم النادي الأهلي، حول تجديد عقده، واستمراره في القلعة الحمراء من عدمه.
وقال رمزي في تغريده له عبر حسابه الرسمي على منصة إكس: "بالنسبة لإمام عاشور وتصريحات وكيله آدم وطني، هو ببساطة بيقول إنه يهمني مصلحة اللاعب قبل الأهلي، وده منطقي علشان هو وكيل إمام وبياخد نسبته من إمام أو من النادي اللي ممكن يتعاقد معاه إمام في المستقبل".
إمام عاشور يبحث عن مصلحته
وتابع: “آدم وطني وكيل إمام عاشور سواء كان آدم أو غيره هيحاول يجيب له عروض علشان يفضل ياخد نسب من العقود الجديدة.. ده شغله ببساطة، وإمام عاشور زيه زي أي لاعب هيفضل يدور على مصلحته الشخصية وإزاي يدور على أكبر مقابل مالي سواء في الأهلي أو خارجه.. ودي خلاص بقت حاجة معروفة ومش محتاجة تكرار إن الجمهور فقط هو اللي منتمي لناديه”.
اللاعب زي الموظف يبحث عن المال
وأردف الإعلامي كريم رمزي: اللاعب زيه زي الموظف في شركة بيدور دايمًا على أفضل عرض مالي.. الفيصل في انتقاد إمام على تصرف خاطئ إنه طوال عقده مع الأهلي الممتد لموسمين بخلاف الموسم الحالي، إنه ميعملش مشكلة أو يقصر في عمله مع الفريق.
رحيل إمام عاشور عن الأهلي
وأضاف رمزي: "الأهلي وهو بيشتري عدد كبير من نجوم الصف الأول لازم يبقى عارف إنه هيبقى بطبيعة الحال عنده صداع طول الوقت من عروض هتيجي للاعبين دول وبفلوس أكتر من اللي بيدفعها الأهلي مهما كانت كبيرة، علشان هتكون بملايين الدولارات.. وبالتالي مادام الأهلي دخل في هذا الطريق (اللي مش شايفه غلط بالمناسبة) لازم يبقى عنده مرونة البيع زي ما بقى عنده قوة الشراء، علشان ميدخلش دايمًا في مواجهات أو مساومات مع أو من اللاعبين".
وأوضح: المهم إن الأهلي لما يبيع وسام أبو علي وبرقم جيد جدًا لازم يكون بديله جاهز في الحسابات ويروح فورًا يتعاقد معاه، نفس الأمر لو جه عرض مغري لإمام.. وقتها الجمهور مش هيبقى عنده أزمة لا مع الإدارة ولا مع اللاعب، والإدارة في نفس الوقت مش هيبقى عندها ضغط طول الوقت إنه فلان عايز يعدل عقده أو عايز يمشي.
واختتم كريم رمزي حديثه قائلًا: أي جمهور في الدنيا بيحب فريقه أكتر من اللاعب.. بس المهم إنه ميشوفش ضرر من رحيل اللاعب على فريقه.. لو محصلش التعويض المناسب.
