روشتة النجاح فى سوق العمل لحديثي التخرج.. 10 نصائح لازم تعرفها
أثار صلاح أبو المجد، خبير التنمية البشرية، مجموعة من النقاط حول سوق العمل، موجها 10 نصائح اعتبرها روشتة النجاح لحديثي التخرج.
وكتب أبو المجد عبر حسابه على فيسبوك، شوية حقائق كده من الواقع العملي عشان ما تحبطش نفسك وتضيع وقتك ووقت الناس وتقدر تلاقي شغل محترم بسهولة، اشتري مني ومتقاوحش وما تدورش ورايا.
- أولا: الإنجليزي لازم يبقى زيه زي العربي عندك، حتى لو هتشتغل في شركة مصرية و العملاء مصريين.. وسماري ولوني مصري.
- ثانيا: الدراسات العليا شيك كوجاهة إجتماعية مش كشهادة شغل أبدا، مفيش شركة هتشغلك عشان معاك ماجيستير.
- ثالثا: أصحى لدي كده، عشان تتعلم مهارة جديدة أو شغلانة معينة محتاج على الأقل تذاكر لها و تمارسها يوميا لكدة ٤-٦ ساعات على الأقل لمدة سنة بحد أدنى عشان تقد تحصل على لقب مبتدئ، مش تروح تاخد كورس ٤ أيام ولا كورس طويل شوية شهر ونصف وألاقيك خارج منه بتدور على شغل و تسمي نفسك بعدها ديجيتال ماركتير ولا بيزنس ديفيلوبر ولا أي خرط من ده، إنت كده بتضيع وقتك ووقت الناس.
- رابعا: كونك شاركت في نشاط طلابي من عينة "آيزك - إناكتس - اي بي اس اف - اي تربل اي" كل ده حاجة كويسة جدا وتشد انتباه اي حد بيفهم بيبص عالى الـ CV.. بس وحياة أبوك ما تزيطش، ده معناه انك أحسن من المتوسط مش معناه إنك ينفع تمسك Regional manager في الشركة.
- خامسا: التعليم اللي بجد مكلف جدا، فلوس وجهد ووقت، متجيش تقولي معاييش فلوس آخد كورسات، أدخل جمعية، اشتغل شغلانة تعبانة اصرف بيها عالكورسات اتصرف متقعدش تشكي همك.
- سادسا: ما تجريش ورا شغفك، دي اشتغالة، اجري ورا احتياجاتك وورا الحاجات اللي ممكن تجيب فلوس.
- سابعا: لو مستعجل انك تجيب فلوس، انا بقولك اهو لو جامد هتاخد سنة عشان يبقى اسمك مبتدئ، اقل من سنة يبقى تروح تعمل نحتاية او سبوبة مش كارير.
- ثامنا: إياك تروح تاخد نصيحة من حد في مجال هو شخصيا مش ناجح فيه، متروحش تسأل مدير إدارة بنك مثلا إزاي أقدر أكون عندي بيزنس اونلاين ناجح، هتبقى حمار لو سمعت كلامه في أي حاجة غير كارير البنوك، متبقاش غبي شوف حد ناجح في المجال اللي انت عايزه و أسأله مش أي حد معدي في الشارع تسأله.
- تاسعا: دايرة علاقتك = مقدار ثروتك، كبر علاقاتك وطورها، احضر ايفنتات، روح مؤتمرات، شارك في ورش، اتحرك يا بِلِط
- عاشرا: فاكس جو أنا مش عارف أنا عاوز إيه اشبط في اي حاجة و بعدين ابقى شوف انت عاوز ايه.
واختتم صلاح أبو المجد، خبير التنمية البشرية حديثه قائلًا: “دي خلاصة ١٥ سنة خبرة وشغل في السوق، اشتري مني والنبي ومتضيعش وقتي ووقتك، والسلام عليكم ورحمة الله وبركاته”.
