بتغني بإخلاص .. ماذا قال محمود سعد عن منح أنغام لقب صوت مصر ؟
علق الإعلامي محمود سعد على تلقيب النجمة أنغام بـ “صوت مصر”، كما أكد أنها تصارع الحياة من أجل تقديم أغاني مميزة تليق بها وبجمهورها.
وقال سعد خلال بث مباشر عبر صفحته الرسمية على فيسبوك : “أنغام بتصارع الحياة علشان تعمل لكم غنوة حلوة .. وعلشان تجيب مزيكا حلوة .. وتقف على المسرح بفستان حلو .. وتفضل محافظة على كل الحاجات الجميلة المحيطة بالصوت .. أصل الحكاية مش حكاية صوت ولا كلمة .. هي تركيبة شاملة الصوت واللحن والتطور في المزيكا والكلام والتوزيع”.
تلقيب أنغام بصوت مصر
وعن لقب صوت مصر، تابع : “بيتخانقوا على صوت مصر .. وأنغام اللي بتغني حلو وبإخلاص .. بس في الوطن العربي في مطربين تانيين مش عاوز ألغبط في الكلام عنهم .. بس هي تستحق أي لقب يتقال عليها .. لأن هي أدركت موهبتها .. وصارعت صراع مرير وتعرضت لحاجات مريرة وقدرت تقاومه علشان تغني حلو”.
وأضاف محمود سعد : “ولو في مجال الواحد علشان الواحد يحكي تفاصيل عيشت معاها حاجات في منتهى الصعوبة .. تحطم أي حد سواء طبيب أو مهندس .. هي قدرت تسيطر على نفسها .. بحيث تكون النجمة الموهوبة اللي تعبر عنكم وبتساعد الأغنية تكون متطورة وجميلة ولها قيمة”.
تطورات الحالة الصحية لأنغام
وكان قد تحدث الإعلامي محمود سعد خلال نفس البث المباشر، عن تطورات حالة أنغام الصحية، حيث قال : "حاليًا الألم تراجع بنسبة كبيرة وقالوا ليها أخرجي اتمشي في الطرقة .. وبتاكل طبيعي حاجات بسيطة .. وما حصلش أنهم أدوها أي أنواع تغذية .. وامبارح كنا مستنيين أرقام التحاليل .. وكلها زي الفل والأمور دلوقتي مية المية .. والحالة دلوقتي تمام التمام .. وفي انتظار الإفراج عنها من ميونخ وتكون عندنا في القاهرة .. والحمد لله الأزمة عدت بدعاكم وحبكم وعارف إنكم بتحبوا أنغام لكن مكنتش متصور للدرجة دي”.
أيضًا كشف سعد تفاصيل أول جراحة خضعت لها أنغام، مضيفًا : “أول حاجة عملتها أنغام منظار عن طريق الفم وما تعتبرش عملية وشالوا لها جزء من الكيس .. وقالوا هنشوف لو الكيس كبر واتحرك هنضطر نعمل عملية كمان .. ولو فضل زي ما هو تروحي بلادكم وكل شهرين تعملي سونار وتبعتي لينا .. لكن بعد يومين الألم زاد وقالوا ليها الكيس بيكبر .. ولازم نشيله ونشيل جزء من البنكرياس .. وبعد 15 يوم عملت الجراحة الثانية من غير أي جرح .. لكن عملوا تلات فتحات لدخول أجهزة معينة.. وشالوا الكيس وجزء من البنكريس والعملية خدت تلات ساعات ونص .. وبعدها خرجت من العناية وراحت أوضتها وخرجت بألم شديدة جدا .. وقعدت فترة كان فيه آلام صعبة وحصل مضاعفات للعملية وكانت متوقعة .. والحمد لله دلوقتي حالتها أفضل كتير .. وأنا بأكد لكم أن الخطورة والألم زال”.
