وفاء الأبوة.. سهير جودة ومفيدة شيحة تنعيان بطولــة تيمور تيمور بإنقاذ ابنه

في لحظة إنسانية مؤثرة امتزج فيها الحزن بالإعجاب، خصّصت الإعلاميتان  سهير جودة ومفيدة شيحة جزءًا من حلقة برنامجهما الستات، المذاع على قناة النهار، لنعي مدير التصوير الراحل  تيمور تيمور، الذي رحل غرقًا خلال محاولته إنقاذ ابنه في الساحل الشمالي.

الحديث كان مليئًا بالمشاعر الصادقة، حيث عبّرتا عن مدى التأثر بفقدانه، ووصفتاه بـ"الأب البطل" الذي قدّم درسًا في الفطرة الأبوية الخالصة.

سهير جودة: "تيمور ضحّى بنفسه.. دي مش بطولة دي فطرة نادرة"

بدأت سهير جودة حديثها بنبرة حزينة: "تيمور تيمور اللي ميعرفهوش، هو مدير تصوير شاطر جدًا جدًا  آخر أعماله كان مسلسل رسالة الإمام مع الفنان خالد النبوي، وكان واحد من أهم عناصر النجاح في المسلسل بسبب الصورة المبهرة اللي قدمها."

وأضافت:"وقبله صور جراند أوتيل ورمسيس باريس والديزل وإبراهيم الأبيض… لكن الأهم من كل ده، إنه عمل اللي ميقدرش أي حد يعمله ضحّى بنفسه علشان ابنه دي مش مجرد بطولة، دي فطرة نادرة جدًا عند الأب الحقيقي، الأب السوي."

وتابعت بتأثر واضح: "هو مات، لكن ساب ورائه قصة إنسانية مش هتتنسي أبدًا… قصة أكبر من أي كلام أو تقييم."

مفيدة شيحة: "الولد هيفضل طول عمره عارف إن أبوه مات عشانه"

أما الإعلامية مفيدة شيحة، فلم تخفِ تأثرها الشديد، وقالت: "هو جري على ابنه ومهموش نفسه اللحظة اللي حصلت فيها الحادثة لحظة صعبة جدًا… ومؤلمة  واللي وجع قلبي أكتر إن الولد هيعيش طول حياته وهو عارف إن أبوه مات علشانه  ده وجع كبير… بس هو قدر، وربنا أراد كده."

وأردفت: "من امبارح، السوشيال ميديا كلها نعي لتيمور. واضح إنه كان محبوب من كل الناس، وخصوصًا من أهل الفن  الناس كلها كانت بتتكلم عنه بحب واحترام شديد."

"ربنا يصبر قلب ابنه وأسرته"

وفي ختام حديثهما، قالتا إن "كل الكلام مش كفاية يوصف اللي حصل"، داعيتين له بالرحمة، ولأسرته بالصبر، خصوصًا ابنه الذي سيحمل هذا المشهد معه طوال حياته.
 "في لحظة اختار فيها أب إنه يموت علشان ولده يعيش... تيمور تيمور أصبح رمزًا نادرًا للحنية والشجاعة في أبسط صورهم."