بدرية طلبة ترد على شائعات عملها خادمة في منزل الراحل حسين الإمام |فيديو
ردت الفنانة بدرية طلبة على بعض الشائعات التي تتهمها بأنها كانت تعمل خادمة في منزل الفنان الراحل حسين الإمام.
وقالت بدرية طلبة في بث مباشر عبر حسابها الرسمي بموقع فيسبوك: “لقيت واحدة بتقول إني كنت شغالة خدامة عند حسين الإمام، شفتيني فين وأنا بخدم؟ هل حسين الإمام كاتب ده في مذاكراته وسابها ليكي؟ إيه الافترى ده!”..
وأضافت بدرية طلبة: “حسين الإمام الله يرحمه لو أطول أمسح الشقة لمراته وعياله هعمل كده ردًا لجمايله عليا، علشان أنا بنت بلد وواكلة على طبلية أبويا، ومعنديش مشكلة أروح أمسح لمراته واشتغل خدامة تحت رجلها لأن حسين الإمام هو اللي عملني”.
وتابعت بدرية طلبة غاضبة :"كل اللي مالوش محتوى عاملني محتوى وستات محجبات. طيب يا شيخة راعي الطرحة اللي أنتي لابساها.. أنا كنت مدرسة في إسكندرية وسبت المدرسة اللي كنت شغالة فيها علشان آجي مع جوزي اللي أنا قتلته، زي ما بيقولوا إني قتلته، عاوزة ست محترمة حد يقولها انتي قتلتي جوزك وبعتي أعضائه تقولي أرد أقول إيه، أنا هرد بالطريقة اللي تريحني وتخلي عيالي مبسوطين إني خدت حق أبوهم وهو في تربته".
وأكملت: “عاوزين مني إيه، أنا عندي مؤسسة خيرية، وبعد ما لغتها هرجعها تاني، وعمري ما كنت شبعة بعد جوعة من كتر العز اللي أبويا عيشني فيه، وبيتقالي يا كومبارس إيه المشكلة لما أكون كومبارس. فيه ناس بتتمنى تعدي قدام الكاميرا. يا ستي أنا كومبارس. أهي الكومبارس دي عملت إعلانات يا ما وحملة من الأمم المتحدة لتوعية المرأة المصرية. أنا كومبارس وعملت كل ده وصوتي على لعبة بابجي ومفيش موسم من مواسم الرياض ما روحتوش. ومفيش دولة عربية ما اشتغلتش مع الكبار فيها”.
