سارة عبدالرحمن تكسر صمتها لدعم محمد عبدالعاطي: «هكون دايمًا مع حرية الرأي»
قررت الفنانة سارة عبدالرحمن العودة إلى مواقع التواصل الاجتماعي بعد انقطاع دام نحو شهرين، لتوجه رسالة دعم مؤثرة للبلوجر محمد عبدالعاطي.
ونشرت سارة عبر حسابها الرسمي على موقع "إنستجرام" صورة تجمعها بعبدالعاطي، مؤكدة أنه يقدم محتوى مؤثر وإيجابي، ويمتاز بالصدق والنقاء وضمير مهني في استخدام منصته، مشيرة إلى حلقاته التي حققت صدى واسع مثل حلقة "محمود سمير".
وقالت سارة في منشورها: "قررت أرجع السوشيال ميديا بعد انقطاع شهرين تقربيا.. بس الموضوع ده أنا متأثرة بيه جدا ومش عارفة أفضل ساكتة. الإنترنت مكان للتعبير عن النفس لكل أطياف المجتمع.. ولو كل اللي عمله شخص هو أنه عبر عن نفسه يبقى أكيد كلنا لازم نتكلم.. هاتكلم عن صانع المحتوى اللي اتعرفت عليه وعلى برنامجه مؤخرا وبقينا أصدقاء في ثانية، عبدالعاطي".
وأشارت: "عبدالعاطي بيقدم محتوى مؤثر وإيجابي، زي مثلا حلقة محمود سمير اللي سمعت عنها من كذا حد قبل ماشوفها، هو فعلا صادق و نقي وعنده ضمير في استخدام منصته. وعلى الصعيد الشخصي هو إنسان جدع وعشري وحساس وبيحب الناس بجد. وألذ حاجة بنجتمع عليها هي الكوميديا وحب الهزار، اللي متفقين إن هي اللي بتهون اللحظات الصعبة. فأنا بأدعي إن اللحظة الصعبة دي تخلص.. وأتمنى نقدر صناع المحتوى اللي معملوش حاجة غير أنهم بيعبروا عن نفسهم. والأكيد إني دايما هاكون مع حرية الرأي للكل".
في لحظة صمت وراء القضبان اشتعلت منصات التواصل جدلًا حول البلوجر محمد عبدالعاطي الشهير بـ"مشمش"، وانطلقت حملة دعم واسعة له، وسط تساؤلات حول موقف صناع المحتوى.. فبينما يُنتقد على صوته أو كلماته الساخرة، يؤكد محبوه أنه فقط صانع محتوى مختلف، دخل قلوب الشباب من أقصر الطرق.
"هيخرج لأنه مش زي الناس التانية".. كلمات حب من القلب إلى الحجز
"مشمش هيخرج عشان معملش حاجة.. عشان هو مش زي الناس التانية".. بهذه الكلمات بدأت منة الخولي، إحدى صديقات البلوجر محمد عبدالعاطي، منشورها عبر حسابها على "الفيس بوك"، ضمن موجة دعم كبيرة انطلقت بعد حبسه.
وأضافت: "محمد عبدالعاطي مش تيكتوكر ومبيفتحش لايفات.. ميشحتش مبيتربحش من أي حاجة غير شغلة "البرنامج بتاعه وحفلاته" عشان مبيفوتش فرصة يساعد فيها حد ويسهل عليه أي حاجة.. عشان بيته مفتوح لصحابه اللي هما إخواته بجد مش صحابه وهيفرح قوي لما يشوف كل الناس اللي بتحبه وبتدافع عنه دي".
