لماذا تنجذب الفتيات للـ Bad Boy؟ صابرين جابر تكشف لنيوز رووم السبب
الـ Bad Boy ذلك المصطلح الذى انتشر بين الشباب تعبيرًا عن الشاب المستهتر متعدد العلاقات العاطفية، الذى يمتلك عددا كبيرا من الصداقات مع أكثر من فتاة فى نفس الوقت، ويخبرهن جميعًا بأنه يحبهن على عكس الحقيقة، ورغم ذلك هناك ما يمكننا أن نطلق عليه انجذاب كبير من الفتيات له رغم كونه "باد بوي"، لذا طرحنا سؤال (ليه البنات بتحب الباد بوي؟) كشفت خبيرة العلاقات الأسرية صابرين جابر لموقع “نيوز رووم” السبب.
ليه البنت بتنشد للباد بوي؟
(حتى وهي عارفة إنه مش مناسب؟)
1- لأنه مختلف وبيكسر الروتين
الباد بوي ليس شبه الولاد “الكويسين اللي بيمشوا جنب الحيط”،
هو شخص متمرد عنده ستايل بيقول اللي هو عايزه
فبيدي إحساس بالإثارة والحرية…
وده بيجذب البنت اللي نفسها تعيش حاجة خارجة عن المألوف.
2- لأنه غامض… والبنت بتحب تفهم وتفك شفرات
هو غير واضح مش بيحكي كتير مش بيقول مشاعره
فالبنت بتحس إنها لازم “تفك رموزه”
وتبدأ تقول لنفسها: “أنا اللي هفهمه… أنا اللي هطلع منه البني آدم الحقيقي”.
3- فكرة التحدي و”أنا اللي هغيره”
فيه بنات بتحب تلعب دور “المنقذة”،
بتشوف الباد بوي حالة محتاجة حب واحتواء وتبدأ تحاول تغيّره…
وتفتكر إن لو اتغير علشانها دي هتبقى علامة إنه حبها بجد.
4- قلة الخبرة ونقص الوعي العاطفي
في السن الصغير الحب بيتفهم غلط:
تفتكره “وجع وقلة نوم وتقلق وانشغال طول الوقت”،
فأول ما الباد بوي يدي الإحساس ده؟
البنت تفتكر إن ده الحب الحقيقي.
فلو لسه قلبك جديد… ومش عايزة تقعي في فخ الباد بوي
وأضافت: حبي نفسك قبل ما تستني حد يحبك
لما تبقي شايفة قيمتك مش هتقبلي بأي حد يجي ويقلل منها بكلمتين.
اكتبي الـ Standards بتاعتك
• إيه اللي تستحقيه؟
• إيه اللي مش هتتنازلي عنه؟
• العلاقة دي لازم يكون فيها احترام،وضوح، أمان، مش قلق وتشكيك .
اسمعي صوتك مش إحساسك بس
• مش كل حاجة بتحرك قلبك تبقى حب
• اسألي:
“هو بيخليني أكون مرتاحة؟
ولا دايمًا متوترة ومش فاهماه؟”
اختاري صحابك
• خلي حواليكي ناس بيفكروك بقيمتك،
مش ناس بتزقك عالفيلم اللي انتي عارفة نهايته.
ما تستعجليش الحب
• مش كل قصة بتبدأ بسرعة بتكمل
• الحب الحقيقي مش بيخبط الباب… بييجي وقت ما تكوني جاهزة تستقبليه.
