صابرين جابر تكشف لـ "نيوز رووم" أضرار كتمان المشاعر
كتمان المشاعر هو عملية يقوم فيها الشخص بتجنب أو قمع مشاعره وعواطفه، سواء كانت إيجابية أو سلبية، بدلاً من التعبير عنها. هذا الكبت يمكن أن يكون له تأثيرات سلبية على الصحة النفسية والجسدية للفرد، وقد يؤدي إلى مشاكل نفسية وعاطفية على المدى الطويل.
وفي تصريحات خاصة لـ موقع نيوز رووم كشفت خبيرة العلاقات الأسرية صابرين جابر، معنى كتمان المشاعر.
قائلة: المشاعر مش عيب… بس الكتمان بيخلّيها مرض، فيه ناس كتير مش بتموت من المرض…
فيه ناس بتموت من السكوت.
مش من وجع في الجسم،
بس من وجع مكبوت جواهم، محدش سمعه، ومحدش شافه.
إحنا اتربّينا على مفاهيم غلط كتير:
“اللي يعيط ضعيف”،
“خلي دموعك لنفسك”،
“الكلام عن اللي وجعك مش نُضج، ده دراما!”
وفضلنا نكتم، ونكتم،
لحد ما بقينا نتوجع وإحنا ساكتين…
نبكي جوانا من غير ما نعرف حتى إحنا ليه متضايقين.
لما الكتمان يبقى عادة
البنت اللي بتضحك وسط الناس،
وترجع بالليل تبكي لوحدها، مش دايمًا بتكون ضعية، دي غالبًا كتمت مشاعر كتير، لحد ما الوجع بقى بيخرج لوحده في آخر الليل.
الراجل اللي عمره ما عبّر عن نفسه،
مش دايمًا قاسي…
ده بس اتربّى على إن الرجولة = صمت.
الأم اللي طول الوقت بتركّز على اللي حواليها،
وبتنسى نفسها…
لما بتنهار، بتنهار فجأة.
ليه؟
علشان مافيش حد كان بيسمعها… حتى هي نفسها.
من الناحية النفسية؟ الكتمان بيهد الجسم
وأكدت صابرين جابر الكتمان مش بس وجع نفسي…
ده بيتحول لضغط مستمر على الجسم.
• النوم بيتلخبط
• الشهية بتتغير
• العقل بيفضل يعيد نفس المواقف
• الجسم بيصرخ من خلال صداع، ضيق تنفس، تعب على الفاضي
المشاعر اللي ما طلعتش في صورة “كلام”،
هتطلع في صورة “ألم”.
مشاعر مكتومة = جسم مش مرتاح = عقل دايمًا تعبان.
والدراسات بتقول إن الناس اللي بتكبت مشاعرها كتير،
بيكونوا عُرضة أكتر للإصابة بالقلق، الاكتئاب،
وحتى أمراض القلب!
ما هو الحل؟
نتكلم.
مش لازم تبقى بطل خارق…
ولا تبقى طول الوقت “كويس”.
كويس دي كلمة بتتقال علشان الناس ترتاح،
مش علشان إحنا بجد بخير.
اتكلم… حتى لو لنفسك.
حتى لو لربنا.
حتى لو على ورقة وترميها بعدين.
بس ما تكتمش.
ما تكتمش زعلك، ولا خوفك، ولا حنينك، ولا احتياجك.
اللي بيتكلم بيخف، واللي بيكتم، بيختنق.
