ياسمين عز عن طلاق كريم محمود عبدالعزيز: "ربنا يعوضهم ويديلهم الخير"
علقت الإعلامية ياسمين عز، على خبر طلاق الفنان كريم محمود عبدالعزيز وزوجته آن الرفاعي، بعد زواج دام 14 سنة.
وقالت «عز» خلال برنامجه «كلام الناس» عبر قناة MBC MASR، الأحد: «طول ما إحنا عايشين في ناس هتتزوج وهتتطلق، اللي يخصنا من هذا الموضوع هو احترام المساحة الشخصية الخاصة لكل شخص حتى لو كان فنان أو نجم».
الفنان في النهاية إنسان
وأضافت: «الفنان في النهاية إنسان، بينفصل وبيطلق زيه زي أي حد، زي ما جوزك محمد طلقك السنة اللي فاتت، عادي جدًا، كريم محمود عبدالعزيز طلق، مجبناش سيرة محمد، فمنجبش سيرة كريم محمود عبدالعزيز».
وتابعت: «نسيب الناس في حالها، إحنا قولنا طلق، خلاص نعمل نقطة، نحترم الحياة الشخصية، بلاش تبقى الشخصية العامة مشاع أي حد يقول، مش عشان هو مينفعش يدافع عن نفسه عشان الكلمة محسوبة عليه، فنستبيح حياته الشخصية».
وأكملت «عز»: «خلاص اتطلقوا ربنا يعوضهم، إذا في نصيب يرجعوا مرة تانية، أو يقدر لهم الخير، نحترم الحياة الشخصية للناس، لا نحلل ولا نقول، مش موضوعنا، مش ابن خالتنا أو قريبنا، هو فنان جميل ومحترم، شوفنا منه كل احترام، فدورنا كجمهور في الحاجات اللي زي دي، ندعي له ونقوله ربنا يوفقك. ونقطة».
ومن ناحية أخرى، علقت الإعلامية ياسمين عز بطريقتها الساخرة على واقعة لاعب نادي الزمالك أحمد فتوح، بعد أن قرر النادي توقيع غرامة مالية عليه وتحويله للتحقيق، إثر خروجه من معسكر الفريق الإعدادي دون إذن، وظهوره في حفل للفنان راغب علامة في الساحل الشمالي.
وكان مدير الكرة بنادي الزمالك، عبد الناصر محمد، قد أوضح أن فتوح غادر المعسكر بحجة مرض عمه، وهو ما أثار الجدل بعد انتشار صور له خلال حضوره الحفل.
وخلال ظهورها على قناة “MBC مصر”، قالت ياسمين عز مازحة: “ليه بتظلموا أحمد فتوح يا جماعة؟ ساب المعسكر بإذن لأن عمه عيان، ومكنش باين عليكم إن عمه هو الفنان راغب علامة، أهو دلوقتي عرفتوا!”
وأضافت: “كلنا عارفين أهمية صلة الرحم… طب شفتوا شهادة الميلاد؟ الرقم القومي؟ تأكدتوا من صلة القرابة؟ دا اسمه أحمد محمد أبو الفتوح، ودا راغب صبحي علامة، مفيش تشابه، بس يمكن عمه من ناحية الأم!”
وتابعت ساخرة: “بلاش نظلم الناس، يمكن الموضوع فيه لبس، بس يا فتوح لما تشوف حد بيصورك في حفلة، خبي وشك في كتف أخوك إمام عاشور أو دخل وشك جوه القميص… الصور بتنزل على فيسبوك في ثواني.”
واستطردت: “الأيام الجاية احتمال حد تاني من العيلة يتعب… يمكن عمرو دياب أو تامر حسني، واضح إن العيلة فنية جدًا، خصوصًا في موسم الحفلات الصيفي.
أنا بصراحة مش عارفة أساعدك إزاي!”
واختتمت تعليقها قائلة: “أنت طويل، متر وتمانين، الكل هيشوفك، فكر كويس المرة الجاية… اتغرمت مليون جنيه، ودي تقريبًا أغلى تذكرة حفلة في أمم إفريقيا!”
