تنظيف الرؤوس السوداء في جلسات العناية بالبشرة.. اعرفي الأسباب والمخاطر

الضغط على الرؤوس السوداء خطوة مهمة في جلسات العناية بالبشرة بس لازم تتم بطريقة صحيحة، لما بتروحي لجلسة تنظيف بشرة، ممكن تلاقي خبيرة التجميل بتضغط على الرؤوس السوداء، وده ممكن يخليكي تتساءلي: هل ده فعلاً مفيد؟ وهل الضغط ممكن يضر البشرة؟

موقع "Verywell Health" نشر تقرير بيشرح فيه الأسباب اللي بتخلي الأخصائيات يعملوا كده، وإزاي الطريقة الصح هي اللي بتحدد إذا كانت النتيجة مفيدة ولا لأ.

إيه هي الرؤوس السوداء؟

الرؤوس السوداء بتكون نوع بسيط من حب الشباب، بتحصل لما الدهون وخلايا الجلد الميت تسد المسام، ولما المادة تتعرض للهواء، بيتحول لونها لأسود.

غالبًا بتظهر على الأنف أو الجبهة أو الدقن، وناس كتير بتضايق منها وبتدور على طريقة آمنة للتخلص منها.

حمض الساليسيليك

حمض الساليسيليك هو نوع من أحماض بيتا هيدروكسي (BHA) يساعد على إزالة الجلد الميت، ويعالج الرؤوس السوداء عن طريق تقشير البشرة ومنع انسداد المسام، كما يساعد على تقليل التورم والاحمرار، ويحارب الجراثيم على البشرة.

يتوفر حمض الساليسيليك في العديد من المنتجات التي تُصرف بدون وصفة طبية، مثل غسول الوجه، والتونر، وعلاجات حب الشباب، ومناديل التنظيف، تحتوي هذه المنتجات عادةً على كمية قليلة من حمض الساليسيليك (0.5% إلى 2%).

ليه الأخصائية بتضغط عليها في الجلسة؟

"ديبرا جاليمن"، خبيرة الجلدية، قالت في التقرير إن إزالة الرؤوس السوداء يدويًا خلال جلسة التنظيف من الخطوات الطبيعية في العناية بالبشرة، لكنها لازم تتم بتعقيم كامل وبأدوات مناسبة.

الهدف منها إنك تتخلصي من الدهون المسدودة في المسام، وده بيساعد على تحسين ملمس البشرة، وبيخلي الكريمات أو السيروم تتغلغل أحسن.

هل الضغط ده بيوجع أو بيضر؟

أوقات بيكون في شوية ألم بسيط أو إحساس بعدم الراحة، خصوصًا في أماكن زي الأنف، لكن لو العملية تمت على إيد خبيرة وبطريقة ناعمة، مش هيحصل أي ضرر.

الخطر الحقيقي لما حد يعمل كده بنفسه في البيت، أو لما يتم الضغط بعنف، لأن ده ممكن يعمل التهاب أو يسيب علامة في البشرة.

ينفع أعمل كده في البيت؟

رغم إن فيه أدوات في السوق بتساعد على إزالة الرؤوس السوداء في البيت، بس الأطباء ما بينصحوش باستخدامها من غير خبرة، الأفضل تسيبي المهمة لخبيرة التجميل.

لو حابة تقللي ظهور الرؤوس السوداء في البيت، ممكن تستخدمي منتجات فيها حمض الساليسيليك أو مقشرات خفيفة، ودي بتساعد على تنظيف المسام.