منة فضالي تهاجم الصناع : ليه تفرضوا علي حد دمه تقيل يبقى بطل؟

هاجمت الفنانة منة فضالي الصناع الذين يمنحون فرص تمثيل لمن لا يستحقون، في ظل ابتعاد عدد كبير من النجوم عن المشهد الفني.

وقالت منة فضالي في لقائها مع إنجي علي في برنامج أسرار النجوم، عبر إذاعة نجوم إف إم : "أنا مش ضد إن فيه جيل جديد يطلع، لأن إحنا كنا في يوم من الأيام جيل جديد، بس عمرنا ما كنا الجيل الجديد اللي بياخد مكان الجيل القديم، وكنا بناخد فرصنا خطوة بخطوة وبنشتغل 3 أو 4 أعمال في وقت واحد".

وواصلت منة : "عمرنا ما كنا بناخد مكان الأساس ولا نبص عليه، ووقتها ماكنش فيه محسبوية في الشغل، وأنا دلوقتي ضد قلة الموهبة، يعني لو حد موهوب وشاطر أنا معنديش اعتراض، لكن أنا ضد دلوقتي إن حد شايفاه مابيعرفش يتكلم أصلًا يمثل، وليه دلوقتي بتفرض علي حد دمه تقيل أو مابيعرفش يقول مخارج الألفاظ ؟".

وأكملت : "أنا بقالي فترة يعتبر موقفة فرجة على المسلسلات لأني بلاقي ناس غريبة أوي، ممكن تقول قلة خبرة مني إني معرفهمش، بس هم مشهورين وممكن يبقوا ناجحين في حتتهم بس مش ناجحين في حتتنا، لأن إحنا حتتنا صعبة أوي".

وتابعت منة فضالي : "ماينفعش أجيب دلوقتي حد لسه بيبدأ ويبقى نجم شباك أو بطل مسلسل، في ظل إنك عندك نجوم قاعدين في البيت كنت بتبيع بيها وبتشغلها، وأنا واحدة من الناس كنت بشتغل كتير جدًا ودلوقتي مابقتش أشتغل خالص

واختتمت : "رمضان اللي فات عملت عمل واحد، ومش بشتغل أوف سيزون خالص في ظل كل المسلسلات اللي بقت تتعمل فيه".

وكانت قد أعربت منة فضالي عن سعادتها الكبيرة بتكريمها في مهرجان الأفضل، الذي أُقيم مساء الإثنين الماضي، وذلك من خلال منشور عبر حسابها على فيسبوك.

وكتبت منة : “حقيقي سعيدة جدًا بتكريمي في The Best،ح سيت بتقدير فعلا شكرًا صديقي العزيز الغالي أحمد الهواري، شكرا The Best”.