لقطات من ندوة أمينة خليل وسلمى أبو ضيف وياسمينا العبد بمهرجان الجونة السينمائي

أُقيمت منذ قليل ندوة نقاشية بعنوان “اختيارات الممثل .. من يصنع الأداء ؟” ضمن فعاليات الدورة التاسعة من مهرجان الجونة السينمائي، وشهدت الندوة حديث النجوم أمينة خليل، سلمى أبو ضيف، أمير المصري، ياسمينا العبد، والكاتبة والممثلة السعودية سارة طيبة.

وكانت قد كشفت الفنانة أمينة خليل خلال الندوة كواليس تعاونها مع المخرج كريم الشناوي في أكثر من عمل منها مسلسل لام شمسية، الذي حقق نجاحاً كبيرًا في موسم دراما رمضان 2025.

وقالت أمينة خليل : “أنا بحس إن علاقتي أنا وكريم الشناوي أو احترامي له كمخرج، هو إني لقيت فيه شخص حكاء قصص وموهوب وعنده شغف، وهو مدير وذكي”.

وأضافت : “أنا بالنسبة ليا الشخص اللي عارف هو عايز إيه، هو اللي ماسك العصاية من النص، واللي عارف إن عنده شغف كبير، بس عارف إيه اللي إنتاجيًا يعرف يتنفذ”.

وأكملت أمينة خليل : “كريم الشناوي كمان بيحترم الممثل، ومش بيتعامل معاه كأنه سلعة أو أداة”.

وكانت قد كشفت خليل خلال نفس الندوة النقاشية بمهرجان الجونة، طريقة اختيارتها للشخصيات التي تقدمها في أعمالها الفنية، مؤكدة أنها لو لم تحب الشخصية لا تقدمها.

وقالت أمينة خليل : “أنا لو مابحبش الشخصية عمري ما بعرف أعملها، وعمري ما هحكم على الشخصية لأننا ماحسناش كل الحاجات اللي في العالم، وأكيد فيه ناس بتفكير مختلف وشعور مختلف بتعمل حاجات مختلفة”.

وأردفت أمينة : “أحياناً في أول قراءة بتبقي بتشتمي الشخصية وتقولي عملتي كده إزاي ؟، علشان أنت مابتبقيش هي لسه، بس كل ما بتفهمي الشخصية وتقربي منها هتديها مبررات، وبوافق لما بحبها والنداهة بتندهني زي منى زكي”.

فيما كشف الفنان أمير المصري، عن كواليس التحضير للشخصيات التي يقدمها في السنيما العالمية، وطريقة تعامله مع الشخصية بمجرد عرضها عليه.

وقال أمير المصري خلال نفس الندوة، والتي تُقام على مسرح سيني جونة، ضمن فعاليات الدورة التاسعة من مهرجان الجونة السينمائي : "بحس الممثل زي المحامي لأني ممكن أبقى ضد القرارات اللي بتاخدها الشخصية، ولو أنا مش طايق الشخصية لازم أفهم هي بتعمل كده ليه ؟، وأكيد مش هحب كل الشخصيات لأني دلوقتي بعمل شخصية سفاح، بس لازم أبقى فاهم هو بيعمل كده ليه ؟.

وعن فيلمه البريطاني الأمريكي Gaint الذي قدم خلاله شخصية محامي، تابع أمير المصري : “قولتلهم هحتاج 5 شهور عشان أتدرب وأكون ملاكم بجد زيهم، ومطلعش أمثل وحددوا المواعيد وجابولي كل اللي احتاجته، وبدأنا في مصر مؤخرًا نعمل كده بس السينما العالمية فيها نظام أكتر”.

أيضًا تحدثت الفنانة ياسمينا العبد عن تفاعل الجمهور والسوشيال ميديا مع الشخصيات التي تقدمها، منها شخصية زينة ابنة محمد شاهين في مسلسل لام شمسية، والتي حققت بها نجاحاً كبيرًا، خلال الندوة النقاشية بعنوان "اختيارات الممثل .. من يصنع الأداء ؟"، ضمن فعاليات الدورة التاسعة من مهرجان الجونة السينمائي.

وقالت ياسمينا العبد : “في الأول والآخر إحنا بني آدمين، وشخصية تيا في مسلسل ميدتيرم كانت جاية من وجع وتروما خليتها تبقى كده، محدش بيبقى مولود بني آدم قذر، ولو تعاطفتي مع الشخصية الموضوع بيكون أحسن وبتدافعي عنها أوقات”.

وأضافت ياسمينا : “لغاية دلوقتي الناس فاكرة إني تيا، ولما عملت كوميدي بعد مسلس لام شمسية فضلوا شايفني زينة بنت وسام، وحاجة كويسة إن الناس تتعاطف مع الشخصية، وده معناه إني عملت شغلي صح”.