محمود ياسين جونيور عن شكوى المنتجين من أجور النجوم : الحل عندهم
علق الفنان محمود ياسين جونيور، على شكوى المنتجين من ارتفاع أجور وطلبات الممثلين، مما يتسبب في أزمات إنتاجية.
واقترح محمود ياسين جونيور أن يغير المنتجين من الأبطال الذي يشكون من أجورهم ويكون البدائل أبطال جدد، مما لديهم طموح وشغف للنجاح، حيث كتب : "بصراحة أنا شايف إن شكوى المنتجين من ارتفاع أجور وطلبات بعض الممثلين ممكن تكون في محلها فعلًا، خصوصًا مع الظروف والتحديات اللي بتمر بيها الصناعة، لكن في نفس الوقت أعتقد إن جزء من الحل موجود عند المنتجين نفسهم".
وواصل ياسين : “ليه نظل متمسكين بنفس الأسماء اللي بنشتكي من ارتفاع طلباتها، وفيه جيل كامل من الممثلين والمخرجين والكتّاب لسه عنده طموح وجوع حقيقي، إنه يعمل حاجة مهمة ويثبت نفسه؟”.
وتابع : “التجارب أثبتت أكتر من مرة إن الجمهور مش شرط يروح للعمل عشان فيه نجم وبس، لو العمل حلو والحكاية قوية والاختيارات صح، الجمهور بيتقبل وجوه جديدة وبيتعلق بيها، وأحيانًا هو نفسه اللي بيصنع منها نجوم”.
وأضاف : “وده مش معناه الاستغناء عن النجوم أو التقليل من قيمتهم، بالعكس وجودهم مهم وليه وزنه، لكن الصناعة الصحية لازم طول الوقت تخلق بدائل وتصنع أجيال جديدة”.
واختتم محمود ياسين جونيور : “يمكن بدل ما نفضل ندور في نفس الدائرة، الحل إننا ندي الثقة والفرصة لناس جديدة تاخد بطولات ومساحات حقيقية، ونستثمر في صناعة نجوم بكرة، لأن لو تكلفة النجوم بقت مشكلة، فجزء من مسؤولية الصناعة إنها تصنع نجومًا جدد، مش تفضل تشتكي من نفس النجوم وتطلبهم في نفس الوقت”.
