دفعلي إيجار 3 شهور .. فتاة تكشف عن تكفل الراحل مصطفى درويش بمصاريفها

رغم مرور أكثر من 3 سنوات على وفاته، إلا أن الفنان مصطفى درويش يظل حيًا بيننا لحب الجمهور له وعلاقاته المميزة في الوسط الفني، بالإضافة إلى أعمال الخير التي كان يقوم بها دون علم الجميع.

وتصدر اسم مصطفى درويش تريند السوشيال ميديا في الساعات القليلة الماضية، بعد أن روت فتاة عبر إحدى الجروبات على فيسبوك تفاصيل مساعدته لها وتكفله بمصاريف إيجار شقتها بعد تعثر حالتها المادية.

وكتبت الفتاة : "يمكن البوست ده بعيد عن محتوى الجروب بس أنا مقدرش أقول كده من الاكونت الشخصي بتاعي، علشان كده عملت الأكونت ده مخصوص، علشان أقول الكلمتين دول لوجه الله".

وواصلت : "ده الفنان مصطفى درويش رحمة الله عليه، وأتمنى البوست ده يكون سبب إن كل الناس تفتكره وتدعيله".

وأكملت الفتاة : "الراجل ده عمل معايا حاجة عمري ما كنت اتخيل إن إنسان قبل ما يكون فنان وحد مشهور إنه يعملها، وهو ولا يعرفني ولا شافني قبل كده".

وأضافت : "أنا كنت مغتربة وشغالة في القاهرة وأنا بدرس واتعثر عليا الإيجار ومكانش في جيبي أقسم بالله غير جنيه واحد، وماسكة الموبايل بقلب فيه وأنا معرفش هروح الشغل تاني يوم إزاي ولا هجيب أكل منين".

وأردفت : "لقيته منزل بوست من الأكونت بتاعه، معرفش إيه خلاني ابعتله وأكلمه وأطلب منه المساعدة في الإيجار بس، وأنا ولا في بالي إنه هيرد أساساً، بس مفيش خمسة دقايق ورد عليا وقالي ابعتيلي العنوان ورقم الموبايل وبعتلي السواق بتاعه بعدها بساعة، بعتلي ظرف فيه تمن إيجار 3 شهور وبعت معاه خزين أكل يكفي ولا شهرين قدام، لحوم ونواشف وخضار وفاكهة وعيش وكل حاجة حرفيًا".

وتابعت : "واتصل سألني إذا كان ناقصني حاجة تانية، وبعتلي على الكاش مبلغ أصرف منه، وقالي فلوس الظرف ادفعيها للإيجار تأمني نفسك 3 شهور واللي على الكاش دول مصاريفك، وكان مبلغ كبير ساعتها يكفيني بجد فوق الشهرين وزيادة، أنا مكنتش مستوعبة اللي الراجل ده بيعمله".

وكشفت الفتاة عن حدوث تغيرات في حياتها بعد مساعدة مصطفى درويش لها، حيث كتبت : "بعدها اترقيت في الشغل وربنا كرمني، وبعتله أشكره، وكانت آخر رسالة منه ليا رد قالي ربنا يكرمك، يعني حتى مطنش إنه يرد عليا".

واختتمت : "أنا معرفش ليه كتبت البوست ده بس لعله يكون سبب في الدعاء له، ربنا يرحمه ويغفر له ويسكنه فسيح جناته ويعوض شبابه في الجنة يارب".