ياسمين عز: جشع بعض التجار ممكن يعمل لنا أزمة ويرفع الأسعار

انتقدت الإعلامية ياسمين عز، خلال تقديم برنامج «كلام الناس» المذاع على قناة «MBC مصر»، تبرير ارتفاع أسعار بعض السلع بالتصدير، متسائلة عن أسباب ارتفاع سعر البصل، بعدما وصل إلى 30 جنيها.

وقالت ياسمين عز: «البصل غلي، زاد 60% وأكتر ووصل ل30 جنيه، نقيب الفلاحين بيقول السبب إنه بيتصدر».

وأضافت: «موضوع إن يا جماعة أي حاجة تغلى أو يغلى سعرها يتلككوا بالتصدير بقى حاجة غريبة جدا، دي بقى الإجابة النموذجية. هو التصدير ده لسه داخل مصر أول امبارح؟ ما طول عمرنا بنصدر».

وتابعت متسائلة عن الجديد الذي أدى إلى ارتفاع الأسعار، قائلة: «إيه اللي حصل بقى جديد؟ فهموا الناس، لأنه بالراحة شوية عن الناس يا جماعة، الناس حقيقي مش مستحملة».

وأشارت إلى أن انتشار الشائعات والأخبار عن ارتفاع الأسعار يسبب حالة من البلبلة، قائلة: «مجرد أصلا إشاعة ونشر الأخبار دي بيعمل بلبلة، إلحقوا البنزين هيغلى، إلحقوا البصل هيغلى، إيه؟ أما لما يغلى البنزين هتعملوا في الناس إيه؟».

ياسمين عز تنتقد تخزين السكر

وتطرقت ياسمين عز إلى ما يتردد بشأن تخزين بعض التجار للسكر، قائلة: «برضو فيه كلام إنه تجار السكر بيخزنوه عشان يبقوا بسعر أعلى لما البنزين يغلى».

وتساءلت: «طب هل البنزين زاد؟ لأ، هل فيه قرار رسمي بزيادته بعد أيام مثلا؟ برضو لأ»، مشيرة إلى أن وزارة البترول نفت تماما هذه الأنباء.

وأضافت: «طيب بتخزن السكر ليه؟ إنت كتاجر بتخزنه ليه؟ بتستبق الأحداث ليه؟ ليه جشع بعض التجار ممكن يعمل لنا أزمة ويرفع الأسعار؟».

سعر البصل ممكن يوصل ل35 جنيها

وقالت ياسمين عز إن ما يقال إن البصل المعروض حاليا مخزن منذ شهر أبريل الماضي، مضيفة: «ومع البيع المخزون بيقل والسعر ممكن يوصل كمان ل35 جنيه».

واستعادت ما قيل سابقا بشأن ارتفاع أسعار البطيخ، قائلة: «فاكرين لما البطيخ غالي في الصيف شعبة الفاكهة قالت إيه وقتها؟ قالت اللي مش عاجبه البطيخ يأكل موز».

واختتمت متسائلة: «طب دلوقتي اللي مش عاجبه سعر البصل يشوح الأكل بإيه؟ بالفجل؟ ولا إيه؟».