أول ظهور بعد سنوات .. خالد محمود يكشف سبب غيابه عن الساحة الفنية |خاص
كشف الفنان خالد محمود خلال ندوته في موقع "نيوز رووم " عن أسباب ابتعاده عن الأعمال الفنية خلال السنوات الماضية ، مشيرا إلى أن قلة عدد المسلسلات وشركات الإنتاج من الأسباب التي أثرت على ابتعاده خلال الفترة الماضية
خالد محمود يكشف سبب غيابه عن الساحة الفنية
وقال خالد محمود في ندوته بـ نيوز رووم : السبب أنا على مدار الفترة اللي فاتت عملت أكتر من عمل ، كان القاصرات مع الفنان الراحل صلاح السعدني ومسلسل ظل الرئيس مع الفنان ياسر جلال ولحم غزال مع الفنانة غادة عبد الرازق ونقل عام مع الفنان محمود حميدة واتعرض عليا حاجات كتير بس أنا يعني من زمان لو ما كانش العمل هيكون فيه رسالة ومؤثر ويوصل للناس بشكل كويس أنا بعتذر عنه .
وأضاف : ده كان سبب اعتذاري عن أعمال كتير اتعرضت عليا الفترة اللي فاتت ، من فترة حوالي 4 سنين مثلا في عام ٢٠٢٢ كنا نقل عام فوافقت لأنه تناسب معايا ، فأنا ما بفرحش إن أنا يجيلي مسلسل عشان أروح أمثل ، لا أنا بنيت قاعدة الحمد لله كبيرة وكويسة مع الناس قائمة على الاحترام وإنك بتقدم رسالة للناس بشكل محترم .
وتابع : أما لقيت للأعمال دي اللي لا تتوافق معايا خطفت في المسرح بيني وبينك فالمسرح برضو لما بتخش فيه بتروح معايا وتلاقي نفسك نسيت كل حاجة ، قعدت في حدود 8-9 سنين بعمل مسرح وبمثل مسرح ومهرجانات في الخارج وجوايز دولية فده برضو كان بيسعدني جدا أن أنا بمثل مصر وبرجع لمصر بجوايز الحمد لله أسعدتني جدا .
واستكمل :لا لو العمل نجح وأنا كنت معتذر عن دور فيه أنا مش راضي عنه ، أنا بفرح أني اعتذرت عنه ، يعني ما يزعلنيش لكن الزعل لو جالك دور كويس وأنت ما خدتش قرار كويس فيه ، أو حصل لك تردد لأي سبب واعتذرت أو يعني الذكاء ما أسعفكش وخانك الذكاء تزعل .
وأردف : طبعا آه فيه أعمال كتير أنا اعتذرت عنها ولكن أنا مش عايز أذكرها ، علشان هتلاقي واحد راح موجهلي تهمة وقالك ده بيشوه العمل ، المعروض عليا حاليا مش زي الأول نظرا لقلة شركات الإنتاج يعني حجمها أقل جدا ، احنا لحد سنة 2010 كان عدد الأعمال الدرامية من 75 لـ 80 مسلسل انت المفروض في 2026 دلوقتي المفروض توصل لـ 600-700 مسلسل فبتعمل 35 عمل وقبل شوية كنت بتعمل 20 عمل فلو تعرض عليك 5-6 أعمال فحلوة قوي ، أنا كان الموسم الواحد بيتعرض عليا 14 مسلسل بختار منهم 7 .
تعاقد الفنان خالد محمود على مسلسل “سلطان الديب” بطولة النجم أحمد العوضي ، والمقرر عرضه خلال شهر رمضان المقبل لعام 2027 .
ويشهد تعاقد خالد محمود على مسلسل سلطان الديب عودته للدراما بعد غياب دام لـ 5 سنوات متتالية .
خالد محمود : أحمد العوضي فنان على خلق ونجم مهم
وقال خالد محمود في تصريحاته لـ "نيوز رووم" : أحمد العوضي يعيدني للدراما بعد غياب 5 سنوات وهو فنان على خُلق ونجم مهم .
