زكي عبد الفتاح: محمد الشناوي يمتلك شخصية لم تظهر في حراس مصر منذ 40 عام
وجه زكي عبد الفتاح، مدرب حراس المرمى، رسالة إلى محمد الشناوي، حارس مرمى الأهلي ومنتخب مصر، أشاد خلالها بشخصيته وطريقة تعامله مع الضغوط والانتقادات التي تعرض لها طوال مسيرته.
وقال زكي عبد الفتاح: أنا ما كانش ليا الشرف إني أتعامل معاك أو أشتغل معاك، بس أنا بقالي حوالي 35 سنة كمدرب، وبقدر أحلل شخصية وتصرفات حراس المرمى، ومش لازم أتعامل معاك عشان أعرف شخصيتك.
وتابع: إنت الحارس الوحيد في مصر اللي عنده شخصية مميزة جدًا جدًا بعد الله يرحمه ثابت البطل، وبقالنا 30 أو 35 أو حتى 40 سنة ما فيش حارس مرمى عنده شخصية ثابت البطل، وإنت الوحيد اللي عندك الشخصية دي.
وأضاف: إنت بتحول كل حاجة سلبية لإيجابية، وما بتتكلمش كتير، وشغلك عندك هو أهم حاجة، ودي كلها صفات صعب جدًا ألاقيها في أي حارس مرمى في مصر خلال آخر 40 سنة.
وأوضح : أنا عارف الكلام اللي بيتقال دلوقتي، وإن المدير الفني طالع عليك والكلام ده، والدنيا كلها قايمة، بس أنا عارف تفكيرك.. إنت هتاخد الموضوع بإيجابية، ومش هتفكر إنك انتهيت أو خلصت، بالعكس، إنت هتشتغل على نفسك.
وواصل: أنا شوفتك أيام ما الجمهور كان بيهاجمك، كنت بتسكت وما بتتكلمش، وبتطلع كل تركيزك في شغلك، وفي الآخر بتثبت للناس العكس.
وزاد: في نفس الوقت لما الناس كانت بتقول الشناوي والسد العالي والكلام ده، برضه الكلام ما كانش بيأثر فيك، وكنت عايز تبقى أحسن.
وأكد : أنا متأكد مليون في المية إنك أقل واحد دلوقتي شاغل تفكيرك بالموضوع ده، الناس كلها حواليك شغالة تفكر فيه، وإنت مش شاغل بالك، إنت بتشتغل وبتثبت العكس.
وأشار إلى : خلي أفعالك هي اللي ترد، وإنت بالفعل بتنفذ المقولة دي: الرجال أفعال مش كلام.
وواصل: أنا فخور بيك جدًا جدًا، وشايف إنك مثال كويس جدًا لولادنا ولحراسنا، وعمري ما شوفتك طلعت قلت على نفسك السد العالي، ولا نمبر وان، ولا أنا العميد ولا العقيد ولا أي حاجة من الكلام ده.
واستمر: رغم إنك حققت حاجات كبيرة جدًا، ومع ذلك عمري ما سمعتك بتتكلم عن نفسك أو تقول أنا عملت وأنا سويت، فأنا فخور بيك، وإنت مش محتاج مني حاجة، أنا بس بوصل لك رسالة وشعوري تجاه شخصية محمد الشناوي اللي بشوفها من بعيد.
وأتم: إحنا خدنا حوالي 40 سنة من أيام الكابتن ثابت البطل عشان يطلع لنا واحد تاني زي محمد الشناوي، وأعتقد بالطريقة اللي إحنا ماشيين بيها في مصر دي، ممكن ناخد كمان 40 سنة على ما تيجي شخصية تانية زي محمد الشناوي.
واختتم: ما تشغلش بالك يا شناوي، وأنا عارف إنك مش محتاج تحفيز.
