«اقفلي الزرار للآخر».. بلوجر تكشف تفاصيل منعها من دخول جامعة بـ أكتوبر وحقيقة تعرضها للتحرش

أثارت البلوجر سلمى حسني حالة من الجدل، بعد نشرها عددا من مقاطع الفيديو عبر موقع «إنستجرام»، تحدثت خلالها عن منعها من دخول جامعة بـ أكتوبر من جانب أحد أفراد الأمن أمام بوابات الجامعة، بسبب ملابسها، وهو ما أثار تفاعلا واسعا بين رواد مواقع التواصل الاجتماعي، وسط تداول حديث عن منعها من دخول الجامعة والتحرش بها.

واقعة جامعة بـ أكتوبر

وعلى الفور، نشرت الفتاة مقطع فيديو جديدا لتوضيح حقيقة الواقعة، وقالت: «يا جماعة أنا متخرجة من الجامعة من بدري أوي وعندي حاليًا 30 سنة.. أنا روحت الجامعة مع أختي كانت عاوزة تسأل عن حاجة في التقديمات والتحويلات هناك.. وصلنا الجامعة الساعة 2».

وتابعت: «أمن البوابة أخد بطايقنا وبعدين قالي أختك هتدخل لوحدها.. قلتله ليه ده أنا أختها الكبيرة.. وكان أمن البوابة لابس مش طبيعي وسنه كبير.. ومكنش باصصلي في عيني أبدا.. بص عليا وعلى جسمي وقالي انتي مش هينفع تدخلي عشان لبسك غير لائق».

وواصلت: «استغربت كلامه لأني لابسة واسع جدا ومقفول "شيميز وتحته تي شيرت".. قال لي اقفلي الزرار للآخر.. ده مش لبس جامعة وانتي مش هتخشي بالشكل ده.. راح رامي البطاقات وقفل الباب الحديد بتاع البوابة».

سلمى حسني توضح حقيقة التحرش

وبشأن ما تردد عن تعرضها للتحرش خلال الواقعة، أكدت الفتاة في مقطع فيديو آخر: «أنا مقولتش إن حد اتحرش بيا.. ولو حد اتحرش بيا مكنتش هصوره عشان أنا وهو كنا هنكون في القسم.. مش عشان هبلغ عنه لا عشان هكون ضربته أو قتلته».