جوري بكر تثير الجدل: "أهم قرار أني اخفيت ابني عن السوشيال ميديا"
أثارت الفنانة جوري بكر الجدل، بسبب انتقادها لظهور الأطفال على السوشيال ميديا وحياة الجمهور وصناع المحتوى التي أصبحت على الملأ، مؤكدة أن أهم قرار اتخذه هو إخفاء ابنها عن السوشيال ميديا، وذلك من خلال منشور عبر حسابها الرسمي على موقع تبادل الصور والفيديوهات إنستجرام.
جوري بكر تكشف عن أهم قرار بحياتها
حيث قالت جوري بكر في منشورها: “كلنا خطائين، وكلنا بنغلط، وأنا واحدة منكم وأكيد غلطت، ومن ضمن أخطائي إني عرضت جزء من حياتي على السوشيال ميديا، بس الحمد لله إن ربنا رزقني بناس في حياتي نصحوني وقالولي إن ده غلط، وأنا فعلا سمعت كلامهم وتراجعت، وقررت أحافظ على خصوصيتي وحياتي لنفسي، والأهم إني أخفيت ابني تمامًا عن السوشيال ميديا، ومش هكدب عليكم السوشيال ميديا بقت وحشة أوي، واللي كان زمان مشاركة وفرحة، بقى أحيانا باب للتدخل والحكم والأذى، في حاجات أجمل لما تفضل بينك وبين ربنا وبينك وبين الناس اللي بتحبك بجد، أنا دلوقتي مؤمنة إن مش كل حاجة حلوة في حياتنا لازم الناس تعرفها، ومش كل نعمة لازم نعرضها.”
جوري بكر تنتقد تداول الحياة الخاصة على السوشيال ميديا
واستكملت جوري بكر حديثها موضحة: "لأن الحقيقة إن الناس مبقتش محتاجة تشوف كل تفاصيل حياتنا الخاصة على السوشيال ميديا، مش كل حاجة بين الزوجين لازم تتعرض للناس، ومش طبيعي إننا نفتح السوشيال ميديا فنلاقي تفاصيل حميمة جدًا من حياة الناس الخاصة، وكفاية استخدام الأطفال كمحتوى، وكفاية إن مرضنا وتعبنا وأوجاعنا تتحول لمحتوى، وكفاية إن كل لحظة في حياتنا تبقى متاحة للناس، سيبوا شوية حاجات تعيش في الخصوصية، وسيبوا الأطفال، يعيشوا سنهم من غير ما كل لحظة في حياتهم تتحول لصورة
وفيديو ومحتوى، السوشيال ميديا مش حياتنا الحقيقية، وحياتنا الحقيقية تستاهل تفضل أغلى وأأمن من كده."
تعرض جوري بكر لأزمة صحية مفاجئة
في سياق آخر، قد أعلنت الفنانة جوري بكر عن تعرضها لأزمة صحية مفاجئة، نقلت على إثرها إلى إحدى المستشفيات، وشاركت جوري بكر عبر ستوري حسابها الرسمي على إنستجرام، صورة لها من داخل المستشفى، وعلقت : “جزع من الدرجة الأولى الحمد لله”.
