نسمة محجوب: وجود فرح الديباني شجعني على تقديم تجربة «فيوجن»
قالت الفنانة نسمة محجوب، إن تعاونها مع الميزو سوبرانو العالمية فرح الديباني ضمن فعاليات «شي آرت» يمثل تجربة فنية جديدة ومختلفة، مؤكدة أنها متحمسة للقاء فرح وبدء البروفات خلال الفترة المقبلة.
وأوضحت نسمة محجوب، خلال مداخلة هاتفية عبر شاشة “سي بي سي”، أن تواصلها مع فرح الديباني خلال الفترة الماضية، قائلة: «أنا مبسوطة قوي، وفرح دخلت معايا مداخلة من الأسبوع اللي فات، فأنا مبسوطة إن إحنا عمالين ندخل في مداخلات لبعض، ولسه لحد دلوقتي ما تقابلناش أصلًا».
وأضافت: «إن شاء الله هنتقابل الأسبوع ده قريب، وبإذن الله نبدأ البروفات كمان، ومبسوطين جدًا ومتحمسين إن إحنا موجودين في «شي آرت»، ودايمًا حابين إن إحنا ندعم فكرة «شي آرت» ونبقى موجودين».
وأشارت نسمة إلى أهمية دعم النساء لبعضهن، قائلة: «أتمنى إن دايمًا يبقى في سيدات طول الوقت بتدعم سيدات زيها، فدي في حد ذاتها حاجة جميلة جدًا، وأتشرف إني أبقى موجودة فيها».
وعن التعاون الفني مع فرح الديباني، قالت: «مبسوطة إن أخيرًا أنا وفرح هنقدر نعمل حاجة مع بعض فعلًا على المسرح، وصوتنا يندمج سوا ونشوف هيطلع منه إيه، يعني دي أول تجربة لينا».
وحول الاختلاف بين طبيعة صوتها وصوت فرح، أوضحت نسمة: «الفرق ما بينا هي نوعية الغنى، هي بتغني أوبرا، وأنا بغني أكتر شرقي، وبغني كوب، يعني السكة الغربية، ولكن مش نوعية غنى الأوبرا».
وتابعت: «أتوقع إن كل حد فينا لما يجرب الجانب الآخر بتاعه، أكيد هيلاقي حاجة إنترست، وأكيد هنقدر إن إحنا نعمل حاجة، بما إن إحنا الاتنين موسيقيين وفاهمين المزيكا، وبنقرأ مزيكا ودارسينها، فأكيد هنعرف نوصل لحاجة تخلينا إحنا الاتنين نظهر، وإحنا الاتنين نشاين، يعني ناخد أحلى حاجة من عندي على أحلى حاجة من عندها».
وأكدت أن وجود المايسترو جورج فولتا يمثل عنصرًا مساعدًا في التجربة، قائلة: «طبعًا بمشاركة جورج فولتا، ده القائد العظيم اللي إحنا الاتنين أصلًا منفردين بنشتغل معاه».
وأضافت: «قبل ما نعمل موضوع الحفلة، وإحنا بنشوف نعمل إيه، كانت الحاجة اللي قعدنا ندور عليها قبل ما نوصل للتيم بتاع الحفلة: مين الأشخاص؟ فكانت طبعًا فكرة إن فرح تبقى موجودة، وإن إحنا نعمل مع بعض حاجة، دي كانت من أكثر الأفكار اللي شجعتني».
وأكدت أن التعاون يمثل جهدًا كبيرًا من الطرفين، موضحة: «مبسوطة منها وحابة جدًا إن الناس كلها تيجي وتحضرها وتتبسط بيها معانا، وتقدر كم المجهود فعلًا اللي بيتعمل من اثنين أرتست، كل حد في بلد، وكل حد عنده عياله، وكل حد عنده الكارير بتاعه، وإن إحنا فعلًا نقتطع من وقتنا ونيجي ونحاول نعمل حاجة ونخترع حاجة»، مؤكدة على أن هدفها من التعاون لا يرتبط بالشهرة أو المال، قائلة: «إحنا كمان كفنانين بنبقى كسبانين، لأن ده مش بيحصل لنا طول الوقت، ولما بيجي لنا فرصة إن إحنا نعمل كده، ده بيبقى بالنسبة لنا مش علشان الشهرة ومش علشان الفلوس، ده بيبقى بسبب إن إحنا فعلًا عايزين نعمل فن مع بعض».
