أحمد شوبير يكشف مفاجأة: الشناوي طلب اللعب أمام إيران ومصطفى وافق
كشف الإعلامي أحمد شوبير كواليس ما تردد بشأن حراسة مرمى منتخب مصر خلال مواجهة إيران، موضحًا حقيقة الأنباء التي أشارت إلى وجود اتفاق مسبق على مشاركة محمد الشناوي بدلًا من مصطفى شوبير.
وقال أحمد شوبير عبر إذاعة أون سبورت: أنا مش عارف الحقيقة أتكلم ولا متكلمش، فيه هبد كتير بيتقال في قصة الشناوي والمنتخب، لكن هتكلم.
وأضاف: قبل ماتش إيران مصر مكانتش ضمنت الصعود، وكمان وقت مباراة إيران ولحد قبل التواجد في الفندق مكانش تم حسم مين حارس الماتش، الشناوي ولا مصطفى شوبير.
وأوضح: كابتن حسام حسن مبيقولش التشكيل إلا في أوضة اللبس قبل المباراة بساعتين، والحقيقة إن مكانش فيه اتفاق مسبق إن الشناوي هيلعب، وكابتن حسام دخل غرفة الملابس وأعلن مصطفى شوبير أساسي في المباراة.
وتابع شوبير: محمد الشناوي اتكلم مع إبراهيم حسن وأبدى حزنه، لأنه عايز يبقى الحارس الوحيد في تاريخ مصر اللي لعب مباراتين في كأس العالم، وده شرف ما بعده شرف وفخر ما بعده فخر.
وأكمل: إبراهيم حسن نقل الموضوع لحسام حسن واتكلموا، وقال خلاص يلعب، ونادى شوبير وقاله معلش يا مصطفى هبدأ بالشناوي، قاله طبعًا يا كابتن، كابتني ويلعب، وده موقف جميل من مصطفى.
وأشار إلى أن الجهاز الإداري أخطر الجهاز الفني بإرسال قائمة المباراة، قائلًا: جابوا الإداري وقالهم الإسكور اتبعت، وهنا يا إما نعمل تقرير إن الحارس اتصاب ويتم استبعاده، أو تشيله وتخليه في المدرجات وتخسر تغيير.
واختتم شوبير: الموضوع منفعش، وحسام قال زي ما إحنا، وهنلعب بمصطفى شوبير، وخلصت القصة هنا. فمكانش فيه اتفاق مسبق إن الشناوي يلعب الماتش، ولا كان مصطفى شوبير يعرف حاجة، ولا كان مترسي على الموضوع، ودي القصة كلها.
