ويجز عن ظهوره بتيشيرت بينك وبليزر أخضر: «مش لازم الناس تهتم بلبس الشخص»

تحدث الفنان ويجز، عن ظهوره بتيشيرت بينك وبليزر أخضر، قائلًا: «أنا مش حاسس إن المفروض يعني يبقى الناس تدي اهتمام كبير قوي لفكرة حد لابس إيه، عادي يعني».

وأوضح خلال لقائها مع الإعلامية إسعاد يونس، ببرنامج «صاحبة السعادة»، عبر شاشة «DMC»، : «ده شو أنا كنت عامله في السعودية ولبس معين عجبني وقتها، وكنت وقتها يعني عاجبني، مش شرط يبقى دلوقتي عاجبني، أو مش شرط أبقى مثلًا طول الوقت هبقى عايز ألبس كده».

وأضاف: «هو مش يونيفورم برده، هو عادي، هو وان تايم، بتلبس اللبس اللي أنت عاجبك ده، وأنا كنت حاسس وقتها إن هو اللونين دول حلوين على بعض».

واختتم ويجز حديثه قائلًا: «إحنا بندي اهتمام كبير قوي لحاجات ممكن تكون يعني دي صغائر الأمور برده في الآخر، يعني واحد لابس حاجة وخلاص».

وعن ارتداء هذه الملابس في حياته اليومية، قال: «أنا ما ألبسش كده غير في حفلة، بصراحة يعني، ما ألبسوش وأنزل بيه الشارع بصراحة، ألبسه في حفلة، ألبسه في سيت أب كده».

قال الفنان ويجز إنه ارتدى الجلابية خلال وجوده في حفلة بليبيا، موضحًا أن ظهوره بها جعل الناس تتحدث عن الأمر، رغم أنه يرى أن ارتداء الجلابية أمر طبيعي، وكان من المفترض أن يكون أكثر شيوعًا.

وأوضح : «حبيت إن أنا مثلًا أطلع بيها مرة، كنا عندنا حفلة في ليبيا، فلبست الجلابية، فالناس كلها بتتكلم عن الموضوع، أنا بقيت اللي هو حاسس إن الموضوع المفروض يبقى عادي أكتر من كده، وإن إحنا نبقى بنلبسها أكتر من كده في العادي».

وأضاف: «حاسس إن دي حاجة فيها إشارة كده إلى إن الجلابية تعني إن ده لبس البلد اللي إحنا منها، عادي، وده اللبس كان الزي الرسمي، ومش من بعيد قوي الناس كلها كانت بتلبس كده».

وتابع: «حاسس إن عادي كل واحد فينا المفروض يبقى عنده واحدة، اثنين، بيلبسهم في أوقات ما يبقى عايز يبقى مرتاح كده، ومش لازم يعني يبقى متكلف قوي، يصلي بيهم الجمعة، ينزل بيهم مع أصحابه، يقعد بالليل، إلخ».

وأشار إلى أنه لا يريد أن تفقد الجلابية طابعها، قائلًا: «حاسس إن هي برده حاجة مش عايزها تفقد إن هي طعمها، وإن بس الشباب يبقوا كمان عندهم استعداد إن هم يلبسوها».